Rossiyada migrantlar uchun qarilik bo‘yicha ijtimoiy pensiya tayinlashni bekor qilish taklif qilindi, deb Nova24.uz RIA Novostiga tayanib xabar berdi.
Ma’lumotlarga ko‘ra, bu tashabbus LDPR partiyasi deputatlari, xususan partiya yetakchisi Leonid Slutskiy boshchiligida ilgari surilgan. Qonun loyihasida xorijiy fuqarolarga ijtimoiy pensiya va unga qo‘shimcha to‘lovlarni to‘xtatish taklif etilgan.
Amaldagi qonunchilikka ko‘ra, Rossiyada doimiy yashaydigan va kamida 15 yil yashagan, yashash guvohnomasiga ega, erkaklar uchun 70 yosh, ayollar uchun esa 65 yoshga yetgan xorijliklar pensiya olish huquqiga ega. Bundan tashqari, federal va mintaqaviy qo‘shimcha to‘lovlar ham mavjud.
Deputatlar Rossiyani ko‘plab xorijliklar uchun aynan pensiya olish imkoniyati sababli jozibador mamlakat deb hisoblashmoqda. Ayni vaqtda, o‘rtacha tayinlangan pensiya Rossiyadagi o‘rtacha oylik ish haqining atigi 28 foizini tashkil etadi, bu esa pensiya darajasining nihoyatda pastligini ko‘rsatadi.
Loyiha mualliflari ushbu chorani pensiya tizimini asossiz ijtimoiy majburiyatlardan himoya qilish, byudjet yukini kamaytirish hamda “Pensiya — davlat hayotida ishtirok etish natijasi, oddiy yashash emas” tamoyiliga ishonchni tiklash yo‘lidagi qadam deb hisoblaydi.
