Oʻzbekiston prezidenti qarori bilan Yoshlar tadbirkorligini rivojlantirish davlat maqsadli jamgʻarmasi tashkil etiladi.
14 fevralda imzolangan “Yoshlar tadbirkorligini hamda ularning bandligini ta'minlashga qaratilgan biznes loyihalarni qoʻllab-quvvatlash tizimini takomillashtirish chora-tadbirlari toʻgʻrisida”gi qarorga koʻra, ushbu jamgʻarma Yosh tadbirkorlarni qoʻllab-quvvatlash jamgʻarmasi negizida, Yoshlar ishlari agentligi huzurida tashkil etiladi.
Jamgʻarma mablagʻlari belgilangan manbalar hisobidan 100 million AQSh dollari ekvivalentiga teng summaga etkaziladi. Jamgʻarma koʻmagida kamida 50 ming nafar yoshlarning bandligini ta'minlash va tadbirkorlikka jalb qilish uning faoliyatining asosiy samaradorlik koʻrsatkichi hisoblanadi.
Belgilangan daryo, kanal va sohil boʻylarida xizmat koʻrsatish, koʻngilochar va dam olish maskanlarini tashkil etish boʻyicha biznes loyihalarni joylashtirish uchun oʻrnatilgan tartibda elektron onlayn auktsion savdolariga chiqarish orqali er uchastkalari ajratiladi.
Yoshlar ishlari agentligining Jamgʻarmaga ajratiladigan mablagʻlari hisobidan Jamgʻarma huzurida ustav fondi 10 million AQSh dollari ekvivalentiga teng boʻlgan yoshlarning istiqbolli startap loyihalarini moliyalashtiradigan venchur jamgʻarma tashkil etiladi.
Oʻzbekiston prezidenti 14 fevral kuni yoshlar bilan muloqot oʻtkazganida yoshlar tadbirkorligida mutlaqo yangi davrni boshlab beradigan 3 ta katta hujjatga imzo chekkanini ma'lum qilgandi. Ulardan biriga koʻra, Yoshlar tadbirkorligini rivojlantirish jamgʻarmasi tashkil etilib, unga 100 million dollar mablagʻ ajratilgani qayd etilgandi. Endi tadbirkor yoshlarga 2,5 milliard soʻmgacha imtiyozli kreditlar beriladi, tashabbuskor yoshlarning startap loyihalariga 2 milliard soʻmgacha investitsiya kiritiladi.
Oʻzbekistonda oʻtgan 8 yilda yosh tadbirkorlar soni 3 karra koʻpayib, bugun biznes vakillarining salkam 40 foizini yoshlar tashkil etmoqda. Ishsiz yoshlar ikki karra kamaydi. Ishsizlikdan xoli mahallalar soni 1 ming 889 taga etdi.
