Joriy yilning 19 dekabr sanasida ekranlarga chiqishi kutilgan "Avatar: Olov va kul" filmi franshizadagi eng uzoq davom etadigan qism bo‘lishi mumkin. Bu haqda film rejissyori Jeyms Kemeron Empire nashriga ma’lum qildi.
“Avatar” olami yanada chuqurroq tadqiq etiladi
Rejissyorning ta’kidlashicha, franshizaning ikkinchi qismi — "Avatar: Suv yo‘li" qahramonlar xarakteriga yetarlicha e’tibor berilmagan holda suratga olingan.
“Filmdagi voqealar xuddi tezyurar poyezd kabi harakatlanar edi. Turli-tuman sarguzashtlarning ko‘pligi esa qahramonlarga yetarlicha e’tibor berishga to‘sqinlik qildi”, — deydi Kemeron.
Yangi filmda necha daqiqa bo‘lishi mumkin?
Franshizaning ilk filmi 162 daqiqa, ikkinchi qismi esa 192 daqiqa davom etgan edi. Yaqin manbalarning xabar berishicha, uchinchi qism bu ikki filmdan ham uzoqroq bo‘lishi mumkin, biroq aniq vaqt hali oshkor qilinmagan.
Franshizadagi katta o‘zgarishlar va yangi syujet qirralari
Jeyms Kemeronning aytishicha, uchinchi qismda Pandora olamining yanada murakkab tomonlari yoritiladi. Ilk ikki qismda asosiy e’tibor vizual effektlar va Pandora sayyorasi madaniyatini namoyon etishga qaratilgan bo‘lsa, "Avatar 3" personajlar xarakteri, dinamik syujet va dramatik to‘qnashuvlarga ko‘proq e’tibor qaratadi.
Filmning nomi "Olov va kul" deb atalishi ham, ehtimol, yangi etnik guruhlar va yangi nizolar haqida hikoya qilinishini anglatishi mumkin.
"Avatar" – eng daromadli franshizalardan biri
Franshizaning dastlabki ikki qismi jahon kino sanoatida ulkan muvaffaqiyat qozongan. "Avatar" (2009) premeradan so‘ng jahon bo‘ylab 2,9 milliard dollar ishlab topgan va hanuzgacha tarixdagi eng kassabop filmlardan biri bo‘lib qolmoqda. "Avatar: Suv yo‘li" esa 2,3 milliard dollardan ortiq daromad keltirgan. Umumiy hisobda, franshiza 5,2 milliard dollardan ortiq daromad ko‘rishga muvaffaq bo‘lgan.
“Avatar: Olov va kul” filmidan tomoshabinlar katta umid qilmoqda. Yanada chuqurroq syujet va yangi personajlar filmni nafaqat vizual jihatdan, balki dramatik qimmat jihatidan ham yuqori darajaga olib chiqishi mumkin.
Jeyms Kemeron franshizani yanada kengaytirar ekan, uni yana bir necha yil davom ettirishni rejalashtirmoqda. Unga ko‘ra, "Avatar" 4 va 5-qismlari ham tasvirga olinishi rejalashtirilgan. Biroq hozircha barcha e’tibor 2025 yil dekabrda chiqadigan "Avatar 3" filmiga qaratilgan.
Sizningcha, yangi film avvalgi qismlardan ham muvaffaqiyatli chiqadimi?
