Gollivudning qora ro‘yxatiga tushgan aktyor va aktrisalar
Gollivudda bir rol bilan mashhur bo‘lish mumkin — va xuddi shunday tezlikda yo‘qolib ketish ham mumkin. Janjal, o‘rinsiz hazil, kimningdir sizdan xafa bo‘lishi — va siz shu ondayoq persona non grata (qabul qilinmaydigan shaxs) bo‘lib qolasiz. Masalan bu yulduzlar ham bir paytlar porlab turishgan, lekin hozir bir chekkada qolib ketishgan.
Ommaviy mojarolar, ayblovlar, tizimga qarshi chiqishga urinish — sabablari turlicha, ammo natijasi bir xil: Gollivudda o‘z o‘rnini yo‘qotishga olib keladi. Quyidagi qahramonlardan ba’zilari ommaviy janjallardan keyin ekranlardan g‘oyib bo‘lishgan, ba’zilari esa tushuntirishlarsiz chaqirilmay qolishgan. Gollivud kerak bo‘lganda jim turishni biladi. Quyida afishalarda ismlari yaqindagina bo‘lgan, ammo hozir taqiqlanganlarning hikoyalarini to‘plangan. Ba’zilari qaytishga muvaffaq bo‘lishdi, ba’zilari esa yo‘q.
Kevin Spaysi: Afsonadan surgunga
Foto: LadyMail
Yaqingacha Kevin Spaysi o‘z davrining eng yaxshi aktyorlaridan biri hisoblanardi. “Shubhali shaxslar” va “Amerikacha go‘zallik” filmlari uchun ikkita “Oskar” olgan aktyor kult rollari va taniqli uslubi bilan mashhur edi. Ammo 2017 yilda bu martaba bir kunda qulab tushdi.
Aktyor Entoni Rapp Spaysi uni 1986 yilda jinsiy zo‘ravonlikka urinishlarida aybladi — o‘sha paytda Rapp 14 yoshda edi. Spaysi to‘g‘ridan to‘g‘ri rad etmadi, hodisani eslay olmasligini aytib o‘tdi xolos. U uzr so‘radi, ammo janjal bitta ayblov bilan chegaralanmadi. Rappdan keyin boshqa o‘ndan ortiq kishi aktyorning yomon xatti-harakatlari haqida bayonot berishdi. Tergovlar boshlandi.
Netflix Spaysini “Kartalar uyi” serialidan chiqarib, shartnomani bekor qildi. Ridli Skott allaqachon tayyor bo‘lgan “Dunyoning barcha pullari” filmini qayta suratga oldi va uni Kristofer Plammmerga almashtirdi. Gollivud uning oldidagi barcha eshiklarni yopdi.
2022 yilda Nyu-Yorkda sud hay’ati Rappga nisbatan Spaysi ishida uni oqladi. 2023 yilda London sudi ham uni to‘qqizta ayblov bo‘yicha aybsiz deb topdi. Ammo ikkita oqlov hukmi ham asosiy narsani o‘zgartirmadi: Spaysi katta kinoga yana taklif qilinmadi.
U qaytishga harakat qildi — kam budjetli filmlarda rol o‘ynadi, intervyu berdi, lekin Gollivud uni baribir qabul qilmadi.
Megan Foks: Birgina so‘z tufayli o‘yindan chiqdi
Foto: Google Images
Megan Foks Gollivudning yangi afsonasi bo‘lishi mumkin edi. “Transformerlar” filmining muvaffaqiyati, matbuotning e’tibori, shartnomalar, qizil gilamlar — barchasi super yulduz maqomiga olib borardi. Ammo birgina intervyu hamma narsani o‘zgartirdi.
2009 yilda Maykl Bey bilan suratga olishni sharhlagan holda, aktrisa rejissyorni Gitlerga o‘xshatdi. Bu shunchaki o‘rinsiz hazil edi, ammo oqibatlari shafqatsiz bo‘ldi. Bey “Transformerlar” ustida Spilbergning prodyuserlik kompaniyasining qo‘llab-quvvatlashi bilan ishlayotganligi sababli, aynan Stiven aktrisani filmning uchinchi qismidan ishdan bo‘shatilishini talab qildi. Shundan so‘ng kinosanoatida Foks bilan “ishlay olmaslik” haqida mish-mishlar tez tarqaldi.
Megan kinoga qaytishga harakat qildi. U “Jeniferning jasadi” va “Ninza toshbaqalari” filmlarida rol o‘ynadi, mustaqil loyihalar va reklama shartnomalari orqali buni yengib o‘tishga harakat qildi. Ammo muvaffaqiyat “Transformerlar” davridagi yulduz maqomidan ancha uzoq edi. Faqatgina so‘nggi yillarda uning karyerasi tiklana boshladi, uning yangi uslubi va qizil gilamlarda paydo bo‘lishi yana jamoatchilik e’tiborini tortdi. 2023 yilda u “Qaytmaslar 4”da rol o‘ynadi, 2025 yilda esa katta animatsion loyihada rol o‘ynashi rejalashtirilgan. Ammo shon-shuhratga yo‘l noaniq bo‘lib qolmoqda. Bir so‘z tufayli u o‘yindan chiqdi — va u qaytishga tayyor bo‘lsa ham, uzoq vaqt chekkada qoldi.
Brendon Freyser: Og‘riq va unutish sinovi
Foto: LadyMail
90 yillarda Brendon Freyser sarguzasht janrining timsoli edi. “Mumyo”, “Junglidan kelgan Jorj”, “O‘tmishdan portlash” — bu filmlar unga mashhurlik va tomoshabinlarning muhabbatini olib kelgandi. U oddiy, jozibali qahramonlarni o‘ynadi va uning katta kinoda uzoq yo‘li bordek tuyulardi. Ammo hamma narsa boshqacha bo‘ldi.
2003 yilda, aktyorning so‘zlariga ko‘ra, u o‘sha paytdagi Gollivud chet el matbuoti assotsiatsiyasi prezidenti Filipp Berk tomonidan jinsiy zo‘ravonlikka uchragan. Voqea Freyser uchun psixologik travma bo‘ldi, ammo u deyarli 15 yil davomida jim qoldi. U bu haqda birinchi marta 2018 yilda GQ jurnaliga bergan intervyusida aytib o‘tdi. Bu vaqtga kelib uning karyerasi allaqachon darz ketgan edi.
Shaxsiy travmalardan tashqari, u turmush o‘rtog‘i bilan og‘ir ajrashish, onasini yo‘qotish, sog‘liq muammolari bilan kurashdi. Shuningdek, ko‘plab operatsiyalar, depressiya, turli loyihalardan ishdan bo‘shatilish — bularning barchasidan so‘ng aktyor butunlay soyada qoldi. “Gollivud meni singan o‘yinchoq kabi tashlab yubordi”, — dedi u keyinchalik.
Ammo Freyser taslim bo‘lmadi. 2022 yilda u “Kit” filmida ekranlarga qaytdi — va erkak roli uchun “Oskar” mukofotini qo‘lga kiritdi. Freyser uchun bu shunchaki g‘alaba emas edi — bu kino dunyosiga qaytish edi.
Rouz Makgouen: Haqiqat karyeradan qimmatroq bo‘lganda
Foto: Google Images
Rouz Makgouen 1997 yilda sodir bo‘lgan zo‘ravonlikda ayblagan Xarvi Vaynshteyniga qarshi ochiqchasiga chiqqan birinchi shaxslardan biri bo‘ldi. Uzoq vaqt davomida u kinosanoat bosimi va maxfiylik shartnomasi tufayli jim turdi. Biroq, 2017 yilda “The New York Times” gazetasida tergov chop etilgandan so‘ng, Makgouen jim turishni to‘xtatdi va #MeToo harakatining asosiy faollaridan biriga aylandi.
Aslida, haqiqatni ochiqlagani uni himoya qilishi kerak edi, lekin hamma narsa teskari bo‘lib chiqdi. Gollivud jim qoldi. Prodyuserlar shartnomalarni bekor qildilar, aktyorlar undan qochishdi. “Agar siz tizimga qarshi chiqsangiz, u sizni yo‘q qilishga tayyor ekanligiga tayyor bo‘ling”, — dedi Makgouen intervyusida. Hozir u aktrisa bo‘lishdan ko‘ra adolat uchun kurashuvchi faollardan biri. Gollivud eshiklari u uchun yopiq. Qiziq tomoni shundaki, u ochishga harakat qilgan haqiqat uning hayotini vayron qildi.
Gollivud chegaradan chiqqanlarni tezda unutadi. Bu yerda itoatkorlarni qadrlaydilar, prinsipiallikni emas. Bu hikoyalar kinosanoatining eng iste’dodlilarni ham qanday osonlikcha yo‘q qilishini eslatib turadi. Shunga qaramay, savol tug‘iladi: bu vaziyatlarda kimni — yulduzlarni yoki ularni chiqarib tashlaganlarni yo‘q qilish kerak?
