Yevropa Ittifoqi 150 milliard yevroli SAFE jamg‘armasiga yo‘l ochdi
Yevropa Ittifoqi Kengashi 27 may seshanba kuni qabul qilgan bayonotda Yevropa Ittifoqi tomonidan 150 milliard yevroga teng Security Action for Europe (SAFE) mudofaa jamg‘armasi yaratilishi ma’qullangani e’lon qilindi.
Press-relizga ko‘ra, yangi jamg‘arma a’zo davlatlarni qo‘shma xaridlar orqali mudofaa sanoati ishlab chiqarishini kengaytirishga qo‘shimcha rag‘bat beradi hamda Yevropa mudofaa sanoati va texnologik bazasiga shoshilinch va katta sarmoyalarni moliyalashtiradi.
Bayonotda ta’kidlanishicha, bu tashabbusning asosiy maqsadi – ishlab chiqarish quvvatini oshirish, mudofaa uskunalarining doimiy mavjudligini ta’minlash va ehtiyojlarni qoplash bilan bir qatorda, Yevropa Ittifoqi umumiy mudofaa qobiliyatini kuchaytirishdir.
Shuningdek, SAFE jamg‘armasi Yevropa Ittifoqiga Ukrainaga yordam berishni davom ettirish imkonini beradi. Bu orqali Ukraina mudofaa sanoatini dastlabki bosqichdayoq qo‘llab-quvvatlash nazarda tutilgan.
Qayd etilishicha, ajratiladigan mablag‘lar a’zo davlatlarga so‘rov asosida «raqobatbardosh» foizlar bilan uzoq muddatli kreditlar shaklida beriladi. Biroq, ushbu kreditlar uchun shartlardan biri – kamida yana ikkita davlat bilan hamkorlikda xaridlarni amalga oshirish talab etiladi.
