Jennifer Lopez konsertiga chiptalar 5 iyundan sotuvda
O‘zbekiston madaniyati va san’ati rivojlanish jamg‘armasi jahon yulduzi JENNIFER LOPEZning Toshkentdagi konsertiga chiptalar sotuvining rasmiy boshlanishi haqida e’lon qildi. Bu haqida Upl.uz xabar berdi.
2025 yil 5 iyundan boshlab muxlislar ushbu ulkan tadbirga chiptalarni xarid qilishlari mumkin. Birinchi marta O‘zbekistonda, 2025 yil 7 avgust kuni “Milliy” stadionida Jennifer Lopezning “Up All Night — LIVE IN 2025” nomli jahon bo‘ylab turnesi doirasida konserti bo‘lib o‘tadi.
Tomoshabinlarni dunyo bo‘ylab mashhur qo‘shiqlar ijrosi, ajoyib xoreografiya va noyob atmosfera kutmoqda. Konsert tashkilotchilarining ma’lumotlariga ko‘ra, chiptalar narxi 1 040 000 so‘mdan 4 100 000 so‘mgacha bo‘lib, har bir tomoshabinga mos keladigan turli variantlar taqdim etilgan.
Energetik raqs uchun turadigan joylar quyidagicha: sahna oldidagi to‘q sariq rangli VIP Standing — 3 770 000 so‘m, sahna yonidagi ko‘k rangli Fanzone — 3 510 000 so‘m, sahna oldidagi yashil rangli Dance Floor — 2 990 000 so‘m. O‘tirish joylari esa uch guruhga bo‘lingan: eng arzon chiptalar — 1 040 000 so‘m (yuqori qavatdagi to‘q moviy zona), o‘rta narxdagi chiptalar — 1 560 000 dan 2 990 000 so‘mgacha (sahna yaqinidagi yoki yaxshiroq ko‘rinish taqdim etuvchi sektorlar), premium joylar — 4 100 000 so‘m (sahna oldidagi binafsha rangli zona).
Chiptalarni iticket.uz sayti, mobil ilovasi va kassalar orqali xarid qilish mumkin. Onlayn xarid qilingach, mobil ilovada avtorizatsiyadan o‘tish lozim.
Biletlar “Mening chiptalarim” bo‘limida paydo bo‘ladi. Kirish uchun QR-kod konsert boshlanishidan 24 soat oldin faollashadi.
Xavfsizlikni ta’minlash va firibgarlikning oldini olish maqsadida chiptalarning skrinshoti yoki qurilmaga yuklab olishiga ruxsat berilmaydi. Konsertga faqat mobil ilovada taqdim etilgan chipta asosida kirish mumkin.
Bu qaror tomoshabinlarni himoya qilish va elektron chiptalarning soxtalashtirilishini, sprekulyatsiyasini oldini olish uchun qabul qilingan. Chiptalar sotuvining boshlanish vaqti: 2025 yil 5 iyun, soat 12:00.
Konsert sanasi: 7 avgust 2025 yil. O‘tkaziladigan joy: “Milliy” stadion, Toshkent.
Tashkilotchi: O‘zbekiston madaniyati va san’ati rivojlanish jamg‘armasi.
