Jaloliddin Ahmadaliev mualliflik huquqini buzdi, jarima olindi

Mualliflik huquqi sohasida huquqbuzarlik qilgan shaxsga nisbatan chora ko‘rildi, deb xabar beradi Intellektual mulk departamenti matbuot xizmati. Bu haqida Upl.uz xabar berdi.

Adliya vazirligi xodimlari tomonidan qo‘shiqchi Jaloliddin Ahmadaliev boshqa muallifning she’rlarini noqonuniy ishlatgani aniqlangan. Xususan, huquq egasining ruxsatisiz va shartnomasiz u Shoxruh Abduvohidovga tegishli bo‘lgan “Yurak”, “Meni deb okardi sochlarning ona”, “Kuzlaringni kizganma mendan” hamda “Barchasini Xudoga soldim” she’rlarini foydalangan.

Mazkur holat bo‘yicha qo‘shiqchiga O‘zbekiston Respublikasi Ma’muriy javobgarlik kodeksining “Mualliflik huquqi va unga aloqador huquqlarni buzish” moddasi asosida ma’muriy bayonnoma tuzilgan. Dang‘ara tuman jinoyat ishlari bo‘yicha sudi tomonidan huquqbuzarga jarima jazosi tayinlangan.

Jarima miqdori departament tomonidan aniq ko‘rsatilmagan, ammo u 1 dan 5 bazaviy hisoblash miqdorigacha bo‘lishi mumkin, ya’ni 375 000 dan 1 875 000 so‘mgacha. Shuningdek, huquq egasi moddiy zarar yetkazilgan taqdirda fuqarolik sudiga murojaat qilishi mumkin.

Bu orqali u yetkazilgan moddiy zararlarni undirib olish imkoniyatiga ega bo‘ladi. Mualliflik huquqini himoya qilishga doir choralar qat’iy amalga oshirilmoqda.