Toshkent xalqaro aeroportida huquqni muhofaza qiluvchi organlar tomonidan o‘tkazilgan tezkor tadbir davomida inson savdosiga aloqador jiddiy jinoyatning oldi olindi. Fuqaro Siddiqova nomzod ayol bilan ijtimoiy tarmoqlar orqali tanishgan, ishonchiga kirib, uni yuqori daromadli ish va’dasi bilan Turkiyaga olib ketmoqchi bo‘lgan paytida Toshkent shahar Ichki ishlar bosh boshqarmasi xodimlari tomonidan fosh etildi.
Tergov ma’lumotlariga ko‘ra, ushlangan ayol o‘zi 5 yildan buyon Turkiyada yashab kelayotganini, bir necha hafta muqaddam O‘zbekistonga qaytganini va jabrlanuvchiga ish taklif qilib, uni yurtish uchun aeroportga olib kelganini ma’lum qilgan.
«Men u bilan WhatsApp orqali gaplashdim. Qiz rozi bo‘ldi. Men uni Turkiyada yo‘naltirishim, til va shaharni o‘rgatishim kerak edi. Lekin aeroportda ichki ishlar organlari tomonidan to‘xtatildi va biz Chilonzor IIBga olib ketildik», — degan izoh bergan Siddiqova.
U bilan birga olib kelingan buyumlar, jumladan, bir nechta xorijiy pasportlar, Toshkent–Istanbul aviareysi chiptalari va mobil telefonlar xolislar ishtirokida tekshirilgan va dalil sifatida rasmiylashtirilgan.
Hozirda mazkur holat yuzasidan Jinoyat kodeksining 135-moddasi — “Odam savdosi” bilan jinoyat ishi qo‘zg‘atilgan. Dastlabki tergov ishlari olib borilmoqda. Tegishli organlar tomonidan ayblanuvchining boshqa jinoiy epizodlarda ishtirok etgan-etmagani o‘rganilmoqda.
Mutasaddilar bu kabi holatlarda fuqarolarni ogoh bo‘lishga, ish va pul va’dalarining ortidan notanish shaxslarga ergashmaslikka, xorijga chiqishda barcha rasmiy va huquqiy hujjatlarni tekshirishga chaqirmoqda.
Odam savdosi — bu faqat shaxsiy hayotga emas, balki butun jamiyat xavfsizligiga tahdid soluvchi jinoiy faoliyatdir. Uni bartaraf etishda barchamizning faol ishtirokimiz muhim sanaladi.
