Barselona Reshfordni sotib olmasa, jarima to‘lashi kerak

Manchester Yunayted jamoasining hujumchisi Markus Reshford faoliyatini Barselona klubida davom ettirishi mumkin. Bu haqida Euro-football.ru xabar berdi.

Barca Universal manbasiga ko‘ra, jurnalist Migel Riko (COPE) ma’lumotlariga tayanib, ikki klub o‘rtasida futbolchini 2026 yil iyungacha ijaraga berish bo‘yicha kelishuvga erishilgan. Shuningdek, ijara muddati tugagach, futbolchini sotib olish huquqi mavjud.

Agar kataloniyaliklar futbolchini sotib olishdan bosh tortsa, ular Manchester Yunaytedga taxminan besh million yevro miqdorida kompensatsiya to‘lashlari kerak bo‘ladi. Reshford ushbu transfer uchun maoshini 30 foizga kamaytirishga rozi bo‘lgan.

Shunga qaramay, uning yillik daromadi taxminan 14 million yevroni tashkil etadi. Sotib olish huquqi faollashganda esa summa 30-35 million yevro atrofida bo‘ladi.

Markus Reshford Manchester Yunayted tarbiyalanuvchisi hisoblanadi. U o‘tgan mavsumning ikkinchi yarmida Aston Villa klubida ijarada o‘ynagan.

Uning Manchester Yunayted bilan shartnomasi 2028 yil yozigacha amal qiladi. Transfermarkt ma’lumotlariga ko‘ra, uning bozor qiymati 50 million yevroga teng.