Galaktionov: Barinov "Lokomotiv" uchun asosiy yetakchi

"Lokomotiv" jamoasi bosh murabbiyi Mixail Galaktionov Dmitriy Barinovning jamoa uchun ahamiyatini yuqori baholadi. Bu haqida Euro-football.ru xabar berdi.

Unga ko‘ra, Barinov ko‘p yillardan buyon "Lokomotiv"ning sardori va yetakchisi hisoblanadi. Murabbiy ta’kidlashicha, Barinov atrofida jamoa shakllanadi va bu futbolchi kelajakda ham jamoaning asosiy o‘yinchilaridan biri bo‘lib qoladi.

So‘nggi transfer oynasida Dmitriy Barinov klubni tark etishi mumkinligi haqida mish-mishlar tarqaldi. Uning xizmatlariga Fransiyaning "Mets" va Turkiyaning "Istanbul Bashakshehir" klublari qiziqish bildirgani aytilmoqda.

Shunga qaramay, hozircha Barinov Moskva jamoasida o‘ynashda davom etmoqda. Dmitriy Barinov "Lokomotiv" asosiy tarkibiga 2016 yilda qo‘shilgan.

Hozirda u jamoaning sardori bo‘lib, klub safida 253 ta o‘yinda maydonga tushgan. Shu vaqt davomida u 10 ta gol urgan va 20 ta golga uzatma bergan.

Uning jamoa bilan tuzgan shartnomasi yana bir yildan so‘ng yakunlanadi. Shu sababli, uning kelajagi borasida ham turli taxminlar paydo bo‘lmoqda.

Galaktionov esa Barinovning jamoa uchun beqiyos ahamiyatga ega ekanini qayd etdi.