PSJ klubi Angliyaning Bornmut jamoasida to‘p surayotgan ukrainalik himoyachi Ilya Zabarniyni sotib olish bo‘yicha kelishuvga yaqin turibdi. Bu haqida Euro-football.ru xabar berdi.
Ma’lum bo‘lishicha, Parij klubi ushbu futbolchini xarid qilish uchun Angliya jamoasiga 60 million yevro taklif qilgan. Mashhur futbol jurnalisti Fabrizio Romano xabariga ko‘ra, ikki klub o‘zaro kelishuvga erishgan va PSJ Zabarniy bilan shaxsiy shartnoma bandlarini joriy yilning may oyidayoq kelishib olgan.
Avvalroq, Zabarniyni xarid qilish natijasida PSJ tarkibidagi rossiyalik darvozabon Matvey Safonov boshqa klubga sotilishi mumkinligi haqida xabarlar tarqalgan edi. Biroq PSJ rahbariyati bu borada hech qanday muammo yo‘qligini, ikki futbolchi bir jamoada faoliyat yuritishi mumkinligini ta’kidladi.
OAVda Safonov uchun ko‘rib chiqilayotgan variantlardan biri sifatida Bornmut klubi ham tilga olingan. Shu tariqa, PSJ yangi futbolchini o‘z safiga qo‘shishga yaqin turibdi va klub ichida jiddiy muammolar yuzaga kelishi kutilmayapti.
