"Barselona" futbol klubi yarim himoyachisi Frenki de Yong jamoa bilan yangi shartnoma tuzishni rejalashtirayotganini ma'lum qildi. Bu haqida Euro-football.ru xabar berdi.
Hozirda 28 yoshli niderlandiyalik futbolchining amaldagi shartnomasi 2026 yilning iyun oyigacha mo‘ljallangan. Shundan so‘ng, u jamoani erkin agent sifatida tark etish imkoniyatiga ega bo‘ladi.
Ommaviy axborot vositalarining xabar berishicha, "Barselona" klub rahbariyati de Yong bilan shartnomani 2028 yilgacha uzaytirishni, shuningdek, yana bir mavsumga cho‘zish imkoniyatini ham ko‘rib chiqmoqda. Frenki de Yong ESPN nashriga bergan intervyusida hozircha shartnoma uzaytirilmaganini, biroq barcha sharoitlardan mamnunligini ta’kidladi.
Unga ko‘ra, klub ham undan qoniqish bildirgan. De Yong yakunda kelishuv yangilanishiga ishonch bildirdi.
Ma’lumot uchun, Frenki de Yong 2019 yildan beri "Barselona" safida to‘p surmoqda. U shu vaqtgacha klub tarkibida barcha musobaqalarda 259 ta o‘yinda maydonga tushgan.
De Yongning "Barselona"dagi faoliyati davom etishi kutilmoqda. Klub va futbolchi o‘rtasidagi muzokaralar davom etmoqda.
