Madridning “Real” jamoasi yarim himoyachisi Braim Dias tez orada klub bilan yangi shartnoma imzolaydi. Bu haqida Euro-football.ru xabar berdi.
Marokashlik futbolchi klub tomonidan taklif etilgan barcha shartlarni qabul qildi. Yaqin kunlarda ushbu kelishuv yakunlanishi kutilmoqda.
Bugun, 3-avgust kuni Braim Dias 26 yoshini nishonlamoqda. Uning “Real” bilan amaldagi shartnomasi 2027 yil o‘rtalarigacha mo‘ljallangan.
O‘tgan mavsumda Dias Madrid klubi safida jami 56 uchrashuvda maydonga tushdi. Ushbu bahslarda u oltita gol urdi va sakkizta golli uzatmani amalga oshirdi.
O‘tgan hafta matbuotda “Real”ning yangi bosh murabbiyi Xabi Alonso Braim Diasni asosiy tarkibda ko‘rmayotgani haqida xabarlar tarqaldi. Shunga qaramay, futbolchining klub bilan yangi shartnoma tuzishi kutilmoqda.
Bu orqali “Real” rahbariyati Diasga bo‘lgan ishonchini namoyon qilmoqda. Shu tariqa, Braim Dias kelgusi mavsumlarda ham Madrid jamoasi safida o‘ynashda davom etadi.
