“Yuventus” Gonsalesni sotmoqchi, lekin taklif yo‘q

Turinning “Yuventus” klubi futbolchi Nikolas Gonsales bo‘yicha takliflarni kutmoqda. Bu haqida Euro-football.ru xabar berdi.

Klub rahbariyati argentinalik vinger bilan xayrlashishga tayyor. Gonsales “Fiorentina” jamoasidan “Yuventus”ga o‘tganidan so‘ng, birinchi mavsumida o‘zini to‘liq ko‘rsata olmadi.

Shu sababli, klub uning transferi bo‘yicha yangi imkoniyatlarni ko‘rib chiqishga ochiq. Hozirda, mashhur jurnalist Fabrizio Romano ma’lumotiga ko‘ra, na “Yuventus” klubiga va na futbolchining o‘ziga rasmiy takliflar kelib tushmagan.

Avvalroq, Nikolas Gonsales Milanning “Inter” jamoasiga o‘tishi mumkinligi haqida mish-mishlar tarqalgan edi. Biroq, bu xabarlar tasdiqlanmadi.

Transfermarkt portali ma’lumotiga ko‘ra, 27 yoshli futbolchining transfer qiymati 24 million yevro atrofida baholanmoqda. Uning “Yuventus” bilan amaldagi shartnomasi 2029 yilning o‘rtalarigacha mo‘ljallangan.

Hozircha futbolchi kelajagi borasida aniq qaror qabul qilinmagan. Klub esa unga qiziqish bildiradigan jamoalardan rasmiy takliflarni kutmoqda.