Tyukavin Ispaniya chempionatida o‘ynashni orzu qiladi
Rossiya terma jamoasi va Moskvaning “Dinamo” klubi hujumchisi Konstantin Tyukavin o‘zini Yevropaning qaysi kuchli chempionatida sinab ko‘rishni istashi haqida so‘z yuritdi. Bu haqida Euro-football.ru xabar berdi.
Uning aytishicha, u eng avvalo Ispaniyada o‘ynashni orzu qiladi. Tyukavin Ispaniya mamlakati, uning iqlimi hamda chempionati o‘ziga juda yoqishini ta’kidladi.
Shuningdek, u bolaligidan “Real” jamoasiga muxlislik qilib kelishini aytib o‘tdi. Futbolchi o‘z oldiga maqsad qo‘yib, unga erishish uchun tinimsiz harakat qilish, mashg‘ulotlarni davom ettirish va o‘z ustida ishlash zarurligini ta’kidladi.
Hozirda Konstantin Tyukavinning “Dinamo” klubi bilan tuzgan mehnat shartnomasi 2030 yil iyun oyining oxirigacha amal qiladi. 23 yoshli hujumchining transfer bozoridagi qiymati taxminan 16 million yevroga baholanmoqda.
Ayni vaqtda futbolchi tizzasidagi og‘ir jarohat sababli jamoaning tibbiy bo‘limida davolanmoqda. Tyukavin tez orada safga qaytib, yana maydonga tushishiga umid qilinmoqda.
