Isroil harbiylari tomonidan G‘azo sektoriga navbatdagi havo hujumi vaqtida 41 yoshli Sulaymon Al-Obeyd halok bo‘ldi. Bu haqida Euro-football.ru xabar berdi.
U norasmiy ravishda “falastinlik Pele” nomi bilan tanilgan edi. Hodisa Sulaymon Al-Obeyd aholiga insonparvarlik yordamini tarqatayotgan paytda yuz berdi.
Ma’lumki, G‘azo sektori 2023 yil oktabridan boshlab Isroil tomonidan kuchli harbiy hujumlarga duch kelmoqda. Sulaymonning ortida rafiqasi va besh nafar farzandi qoldi.
Sulaymon Al-Obeyd o‘z faoliyati davomida bir necha bor Falastin chempionatining eng yaxshi to‘p urari bo‘lgan. U 2010 yilda Yaman terma jamoasiga qarshi o‘yinda mamlakat terma jamoasi tarixidagi eng chiroyli gollardan birini urgan.
Sulaymonning futboldagi yutuqlari va insoniy fazilatlari ko‘pchilik tomonidan hurmat bilan eslanmoqda. Mazkur fojia G‘azo sektoridagi tinch aholi hayoti uchun qanchalik xavfli vaziyat yuzaga kelganini yana bir bor ko‘rsatmoqda.
