«Pari Sen-Jermen» jamoasining o‘ng qanot himoyachisi Ashraf Hakimi yaqinlashib kelayotgan «Oltin to‘p» mukofoti topshirilish marosimi haqida o‘z fikrlari bilan o‘rtoqlashdi. Bu haqida Euro-football.ru xabar berdi.
Marokashlik futbolchi nufuzli shaxsiy mukofotga nomzod bo‘lgan 30 nafar futbolchi qatoridan joy oldi. G‘olib nomi 22-sentabr kuni e’lon qilinadi.
Ashraf Hakimi intervyusida shunday dedi: «O‘ylaymanki, men «Oltin to‘p» mukofotiga loyiqman, biroq himoyachilar uchun bu sovrinni qo‘lga kiritish ancha mushkul. Ko‘pchilik meni hujumkor yarim himoyachi sifatida ko‘radi, ammo men o‘ng qanot himoyachisi sifatida maydonga tushaman va asosan himoyaga e’tibor qarataman».
Hakimi «Pari Sen-Jermen» tarkibida Chempionlar ligasi, Fransiya chempionati, Fransiya kubogi va mamlakat Superkubogida g‘alaba qozonishda jamoaga yordam berdi. Uning hisobida Luis Enrike boshchiligidagi jamoa safida 55 o‘yinda 11 ta gol va 16 ta golli uzatma bor.
