“Inter” Jovanni Leoni transferida peshqadam, “Liverpul” moliyaviy ustun

Yevropaning yetakchi futbol klublari “Parma” jamoasining markaziy himoyachisi Jovanni Leoni uchun kurashni davom ettirmoqda. Bu haqida Euro-football.ru xabar berdi.

So‘nggi paytlarda 18 yoshli futbolchini qo‘lga kiritish uchun asosiy da’vogarlar sifatida Angliyaning “Liverpul” va Italiyaning “Inter” klublari ko‘rsatilmoqda. Avvalroq unga “Milan” va “Yuventus” jamoalari ham qiziqish bildirgani haqida xabarlar tarqalgan edi.

Sport Italia nashrining ma’lumotiga ko‘ra, hozirgi vaqtda ushbu iste’dodli futbolchini qo‘lga kiritish borasida “Inter” jamoasi peshqadamlik qilmoqda. Biroq “Liverpul” moliyaviy imkoniyatlari bilan raqiblaridan ustun turadi va agar ular istasa, Jovanni Leonini o‘z safiga qo‘shib olish ehtimoli yuqori.

Jovanni Leoni aynan “Inter” klubiga o‘tishni ma’qul ko‘rayotgani aytilmoqda. Sababi, u ushbu jamoa bosh murabbiyi Kristian Kivu bilan yaqindan tanish va uning tizimida o‘zini ko‘rsatishiga ishonadi.

“Parma” klubi yosh himoyachi uchun taxminan 40 million yevro miqdorida tovon puli talab qilmoqda. Shu tariqa, Jovanni Leonining kelajagi hali ham ochiq bo‘lib qolmoqda va uning qaysi jamoaga o‘tishi yaqin orada ma’lum bo‘ladi.