Manchester Siti jamoasi darvozaboni Ederson Moraes Turkiyaning Galatasaray klubi safiga o‘tishi mumkin. Bu haqida Euro-football.ru xabar berdi.
Hozirda ikki klub o‘rtasida muzokaralar davom etmoqda. Ma’lumotlarga ko‘ra, Galatasaray Ederson transferi uchun yangi taklif tayyorlamoqda, chunki avvalgi 7-8 million yevro va bonuslarni o‘z ichiga olgan taklif Manchester Siti rahbariyatini qoniqtirmagan.
Shuningdek, Galatasaray Ederson bilan shaxsiy shartnoma bo‘yicha kelishuvga allaqachon erishgan. Bugun ushbu transfer borasida muhim kun sanaladi va tomonlar yakuniy qarorga kelishi kutilmoqda.
Ederson 2017 yildan beri Manchester Siti safida harakat qilib kelmoqda. O‘tgan mavsumda u jami 40ta o‘yinda maydonga tushdi.
Shu davr mobaynida darvozabonga 54ta gol urildi, biroq u 13ta o‘yinda darvozasini butun saqlab qoldi. 31 yoshli braziliyalik darvozabon o‘zining tajribasi va ishonchli o‘yini bilan ajralib turadi.
Galatasaray Ederson transferi orqali jamoasini kuchaytirishni maqsad qilgan. Muzokaralar natijasi yaqin kunlarda ma’lum bo‘lishi kutilmoqda.
