Xushnudbek Xudoyberdiyevning o‘yinoldi fikrlari: Omadimiz kelsa 0:0, kelmasa...
Xabaringiz bor, bugun O‘zbekiston milliy terma jamoasi Jahon chempionati-2026 saralashi doirasida Eron terma jamoasi bilan o‘ynaydi. Ushbu uchrashuv oldidan futbol jamoatchiligi, shuningdek, jamoat arbobi sanalgan boshqa soha vakillarining uchrashuv haqidagi taxminlari bilan qiziqdik.
Quyida huquqshunos, bloger hamda Milliy mass-mediani qo‘llab-quvvatlash va rivojlantirish jamoat fondi direktori Xushnudbek Xudoyberdiyevning o‘yinoldi fikrlari bilan tanishib chiqishingiz mumkin.
- Ertangi uchrashuvda terma jamoamizni g‘alaba qozonishiga ishonyapsizmi?
- Ishonmayapman, lekin umid va duo qilyapman.
- O‘yin jarayoni sizningcha qanday kechadi?
- Juda qiyin. Menimcha, saralash bosqichidagi eng og‘ir o‘yin bo‘ladi. Birinchidan, Eron o‘z muxlislari ko‘z o‘ngida Jahon chempionati yo‘llanmasini yirik hisobda g‘alaba qozonib, qo‘lga kiritishni xohlaydi. Shu sababli, masalan, 1:0 yutayotgan bo‘lsa ham, hujum qilishda davom etaversa kerak. Ikkinchidan, Eron uchun biz prinsipial raqibmiz, musobaqaning ahamiyati va darajasidan qat’i nazar, ular doim biz bilan murosasiz o‘ynashadi.
- Taxminan, qanday hisob qayd etiladi va kimlar gol uradi?
- Omadimiz kelsa, 0:0 durangni saqlab qolamiz. Omadimiz kelmasa, 2:0 yoki 3:0 bo‘lishi mumkin. Ilohim, omadimiz kelsin.
- Umumiyroq savol. Termamizning ikkinchi o‘rinni olib, Jahon chempionatiga chiqish imkoniyatini qanday baholaysiz?
- 60%. Ayrim nashrlar O‘zbekiston imkoniyati 90% dan baland baholayotgani meni hayron qoldirmoqda. Vaziyatga real qarasak, bunday katta imkoniyatimiz yo‘q. Masalan, Eronga o‘xshab bittagina durang yoki hattoki bittagina g‘alaba ham bizni JCHga olib chiqa olmasligi mumkin. Ahamiyatlisi, 8-turdan keyin bizning imkoniyatimiz ko‘payish o‘rniga pasayishi ham mumkin. Masalan, Eronga yutqazsag-u, BAA va Qatar yutsa, imkoniyatimiz 50% ga tushadi. Mabodo, Xudo ko‘rsatmasin, BAAga ham yutqazib qo‘ysak, unda 20-25% ga tushib ketadi. Xullas, bizni juda qiyin 3ta o‘yin kutib turibdi.
