Farg‘onada super o‘yin yoxud 4-sanada 4-turga start beriladi

4 aprel kuni Superliganing 4-turi boshlanadi va 6 aprelga qadar davom ettiriladi. Faqat bu safar 7 ta juftlik ishtirokidagi uchrashuvlarga guvoh bo‘lamiz. “Qizilqum” – “Xorazm” uchrashuvi boshqa muddatga qoldirildi.

4 aprel.

18:00. “Buxoro” – “Bunyodkor”

Boshlanishi B harfi bilan yuritiladigan jamoalar ishtirokidagi bellashuv o‘ziga xos ahamiyatga ega. “Bunyodkor” klubi mag‘lubiyatsiz odimlamoqda va hisobida 7 ochko bor. “Buxoro” garchi mag‘lubiyat bilan boshlagan bo‘lsa-da, keyingi ikkita turda ishonchli g‘alabalarga erishdi. Har ikki klub joriy mavsumda o‘zlaridan yaxshi taassurot qoldirishayotgani e’tiborga molik. “Buxoro” ham, “Bunyodkor” ham jangovar o‘yin namoyish etishmoqda. Odatda, bu kabi jamoalar o‘rtasidagi o‘yin g‘oyat shiddatli hamda qiziqarli ruhda o‘tadi.

20:15. “Surxon” – “Qo‘qon-1912”

Ikkala jamoa ham chempionatda hozircha g‘alaba nimaligini bilmayapti. Pro ligadan qaytgan qo‘qonliklarda g‘alaba bo‘lmaganiga yarasha mag‘lubiyat ham yo‘q. Uchta o‘yinda uchta durang o‘ynashdi. “Surxon”da esa natijalar yomon. Barcha o‘yinda mag‘lubiyatga uchradi. Bu safar termizliklar uchun yana bir imkoniyat. O‘z maydonida, muxlislari qarshisida maydonga tushishadi. “Qo‘qon-1912” ilk bor olis safarga chiqadi. Bungacha uchta turni asosan o‘z hududida o‘tkazdi. Ikki marta Qo‘qonda va bir marta Farg‘onada “Neftchi”ga qarshi bahs olib bordi. “Surxon” ruhiy o‘raga tushib qolgani bois undan qutulishi qiyin bo‘lyapti. Qo‘qonliklar ham dastlabki g‘alabasi uchun kurashadi. Biroq “Surxon” maydonida bir ochko qo‘lga kiritadigan bo‘lsa ham buning uchun ular ortiqcha tanqid qilinmasa kerak.

5 aprel.

19:30. “Neftchi” – “Navbahor”

Turning markaziy o‘yini. Farg‘onadagi “Istiqlol” stadionida vodiy derbisi bo‘lib o‘tadi. Chempionlik uchun asosiy da’vogarlardan sanalgan “Neftchi” uchta turda uchta durang o‘ynab qo‘ydi. “Navbahor” esa bir g‘alaba va ikki durangga ega bo‘lib turibdi. G‘alabaga tashna bo‘lib turgan farg‘onaliklarni endi durang qoniqtirmaydi. “Navbahor” o‘tgan turda ham vodiy derbisida ishtirok etgan va o‘z uyida “Andijon”ga qarshi uchrashuvda oxirgi daqiqada g‘alabani qo‘ldan chiqargan. Navbatdagi derbida endi farg‘onaliklarda bosim ko‘proq bo‘ladi. Shundoq ham har turda “Neftchi”da kuchli bosim sezilyapti va bu tabiiy. Bunday qimmatli va yulduzli tarkib bilan har bir o‘yinda g‘alaba qozonishi shart bo‘lib qolgan. Derbida hozircha imkoniyatlar teng. Qolganini o‘yinda ko‘ramiz.

20:15. “Sho‘rtan” – “Nasaf”

Bu yoqda vodiy derbisi, u yoqda esa voha derbisi. “Sho‘rtan”ning uy arenasi ta’mirlanayotgani sababidan Qarshidagi “Markaziy” stadiondan foydalanyapti. Shu bois “Nasaf”ga qarshi bahsda “Sho‘rtan” nominal mezbon maqomida, “Nasaf” esa uyida “mehmon” rolida. Superligada gol urmagan birgina “Sho‘rtan” qoldi. Anvar Berdiyev jamoasi uchun navbatdagi uchrashuv yanada og‘ir o‘tishi ma’lum. Tarkib, o‘yin va nom jihatidan “Nasaf”ning favoritligiga hech kimda shubha yo‘q. “Sho‘rtan” o‘tgan turda Qo‘qonda dastlabki ochkosini qo‘lga kiritdi. Derbida jiddiy kurash kechadi, ammo tajriba ko‘p narsani hal qilsa kerak.

6 aprel

17:45. “Andijon” – “Mash’al”

Uchta turda uchta durang o‘ynagan “Andijon” klubi bu safar Muborakning “Mash’al” jamoasini qabul qiladi. 2 aprel kuni “Mash’al” Toshkentda qoldirilgan o‘yin doirasida “Paxtakor”ga 5:0 hisobida yutqazdi va ular Andijonga qanday kayfiyatda kelishlarini tasavvur qilish qiyin emas. Aftidan, jamoa a’zolari 29 mart kuni Jizzaxda “So‘g‘diyona” ustidan qozonilgan g‘alabada (1:0) bor kuch va imkoniyatlarini ishga solib yuborgan ko‘rinadi. “Andijon” mavsumdagi birinchi g‘alabasini qo‘lga kiritish uchun yaxshi imkoniyatga ega.

18:00. “So‘g‘diyona” – “Paxtakor”

Bu juftlik ham turning qiziqarli o‘tishi kutilayotgan bellashuvlardan biri. “So‘g‘diyona” kutilmaganda startni juda yomon boshladi va uchta turda uchta mag‘lubiyat! “Paxtakor” ham ikkita turda ikki marta yutqazib, yaxshi boshlay olmagandi. 2 aprel kuni 1-turning qoldirilgan uchrashuvi doirasida “Mash’al” bilan uchrashuvda bor alamini oldi va javobsiz 5 ta gol urdi. “Paxtakor”ga qarshi uchrashuvda maydonda chinakam jang bo‘ladi. “So‘g‘diyona”da garchi omadsizlik bo‘lsa-da, “Paxtakor”ga qarshi bellashuv uchun motivatsiya yetarli bo‘lsa kerak. Bu bahsda murabbiylarning taktikasi hamda tayyorgarligi ko‘p narsani hal qiladi.

20:15. OKMK – “Dinamo”

Musobaqa peshqadami – OKMK bu safar Samarqandning “Dinamo”sini qabul qiladi. Uchta turda uchta g‘alabaga erishgan Mirjalol Qosimov jamoasini oson bo‘lmagan uchrashuv kutmoqda. Chunki Vadim Abramov har qanday raqibga qarshi himoyaga chekinadigan emas, balki hujumkor uslubni qo‘llaydi. Shu orqali ular Namanganda g‘alabani qo‘ldan chiqarib durang o‘ynadi. Uyida “Mash’al”ni, Toshkentda esa “Paxtakor”ni yutdi. O‘z navbatida samarqandliklar uchun OKMKga qarshi bo‘ladigan o‘yin og‘ir o‘tadi. Murabbiylar bir-birini yaxshi bilishadi. Tomoshabop o‘yin kechishi katta ehtimol.