Joriy haftada Turkiyaning Istanbul shahri dzyudo bo‘yicha yoshlar o‘rtasidagi nufuzli «European Cup – 2025» turniriga mezbonlik qildi. Unda O‘zbekiston yoshlar terma jamoasi muvaffaqiyatli ishtirok etib, xalqaro maydondagi obro‘sini yana bir bor namoyon etdi.
Ushbu nufuzli sport tadbiriga dunyoning qariyb 30 mamlakatidan 500 nafardan ziyod iste’dodli dzyudochilar tashrif buyurgan edi. Kuchli raqobat va keskin kurashlarga boy bo‘lgan turnirda O‘zbekiston yoshlari yorqin chiqishlari bilan muxlislarning e’tiborini tortishga muvaffaq bo‘ldi.
Xususan, o‘z vazn toifalarida gilamga chiqqan ikki vakilamiz — Aselxan Aralbayeva hamda Umida Nig‘matova barcha raqibalarini yengib, munosib ravishda oltin medallar egasiga aylandi. Bu yosh dzyudochilarning har bir g‘alabasi mamlakatimizning sport sohasidagi salohiyatini ko‘rsatuvchi muhim voqelik bo‘ldi.
O‘g‘il bolalar o‘rtasida ham yosh dzyudochilarimiz juda yaxshi natijalar ko‘rsatishdi. Musobaqaning finaligacha yetib borgan Dilshodbek Hamroyev (-66 kg) hal qiluvchi bellashuvda kichik farq bilan mag‘lub bo‘lib, sharafli kumush medalini qo‘lga kiritdi. Undan tashqari, yana bir vakilimiz Bunyod Safarov (-73 kg) bronza medali bilan yurtimizga qaytadigan bo‘ldi.
Ta’kidlash joizki, O‘zbekiston yosh dzyudochilari bu musobaqada umumjamoa hisobida ham yuqori natija qayd etdi. Ikki oltin, bir kumush va bir bronza medalini qo‘lga kiritgan jamoamiz umumiy reytingda ikkinchi o‘rinni egallab, xalqaro sport maydonida mamlakat obro‘sini yana bir bor mustahkamladi.
Mazkur natijalar kelajakda o‘zbek dzyudosining katta xalqaro maydonlarda yanada yuksalishi uchun yangi umidlar uyg‘otmoqda. Sport mutaxassislari va trenerlar ushbu yosh iste’dodlarning kelgusi turnirlarda yanada yorqin natijalar ko‘rsatishlariga ishonch bildirmoqda.
Tabriklaymiz, chempionlar! Yuqori marralarga intilishda davom eting!
