"Real" yangi davr ostonasida: Xabi Alonso "Bayer"dan ikki yulduzni olib kelmoqchi!
Bu mavsum yakunlanishi bilan “Bayer” klubini tark etib, Madridning "Real" jamoasi boshqaruvini qabul qilishi deyarli hal bo‘lgan ispaniyalik yosh mutaxassis Xabi Alonso transfer bozorida jiddiy harakatlarga kirishmoqda. "Real Madrid Confidential" nashrining ishonchli manbasiga ko‘ra, kelgusi mavsum uchun tarkibni kuchaytirishni rejalashtirgan Alonso, jamoa rahbariyatiga transferlar borasida o‘z talab va istaklarini yetkazgan.
Xabi Alonso madridliklar safida ko‘rishni xohlagan asosiy futbolchilar qatorida ikki nafar himoyachi bor va har ikkisi ham hozirda “Bayer” sharafini himoya qiladi. Ular — tajribali chap qanot himoyachisi Aleks Grimaldo hamda markaziy himoyaning ishonchli tayanchi Jonatan Ta. Xabi bu futbolchilarni o‘z uslubi va futbol falsafasiga mos kelishi tufayli Madrid jamoasiga olib kelmoqchi.
Ma’lum qilinishicha, “Bayer” klubi rahbariyati Aleks Grimaldo uchun taxminan 30 million yevro atrofida badal puli talab qilmoqda. Uning hozirgi shartnomasi 2025 yilning yozida o‘z yakuniga yetadi. Unga "Real" bilan bir qatorda Kataloniyaning “Barselona” klubi ham qiziqish bildirmoqda va bu transfer uchun katta raqobat vujudga kelishi kutilmoqda.
Jonatan Taning ham klub bilan shartnomasi 2025 yilgacha mo‘ljallangan bo‘lib, u shartnoma muddati tugaganidan keyin erkin agent sifatida klubni tark etishi mumkin. Ammo "Real" uni yozgi transferlar oynasidayoq tezroq o‘z saflariga qo‘shib olish uchun harakat qiladi. 27 yoshli Ta markaziy himoya chizig‘ida o‘zining qat’iyati, kuchli jismoniy holati va ishonchli o‘yini bilan tanilgan.
Shu bilan birga, Madridning "qirollik klubi" "Arsenal"ning yosh va iste’dodli himoyachilari Uilyam Saliba hamda Lyuis Skellini ham ehtimoliy transfer ro‘yxatiga kiritgan. Biroq Xabi Alonso ulardan ko‘ra o‘zining olmon klubidagi shogirdlari Grimaldo hamda Tani ustuvor tanlov sifatida ko‘rmoqda.
Zamin.uz tahririyatining fikricha, Xabi Alonsoning Madriddagi faoliyati qiziqarli va yangi o‘zgarishlarga boy bo‘lishi kutiladi. Ispaniyalik mutaxassis kelasi mavsum uchun kuchli va ishonchli jamoa shakllantirishiga ishonamiz. Bu transferlarning amalga oshishi "Real"ning yangi davri uchun muhim ahamiyat kasb etishi mumkin.
