O‘zbekiston milliy terma jamoasi Jahon chempionati saralashi doirasida Birlashgan Arab Amirliklariga qarshi bo‘lib o‘tadigan hal qiluvchi o‘yinga jiddiy hozirgarlik ko‘rmoqda. Hozirda BAAning Abu-Dabi shahrida mashg‘ulotlarni olib borayotgan terma jamoamiz tarkibida yuqori kayfiyat va ishtiyoq hukm surayotgani qayd etilmoqda.
Jamoamizning yetakchi futbolchilaridan biri, tajribali yarim himoyachi Jaloliddin Masharipov uchrashuv oldidan jamoadagi umumiy holat, kayfiyat, motivatsiya masalasi hamda o‘zining shaxsiy jismoniy tayyorgarligi haqida muxlislarga ma’lumot berib o‘tdi.
“Jamoada hozirgi kayfiyat juda yaxshi. Har bir futbolchi bo‘lajak o‘yinning ahamiyatini va unga jiddiy yondoshish kerakligini yaxshi tushunadi. Ammo juda ko‘p motivatsiya ham futbolchiga yomon ta’sir qilishi mumkinligini unutmasligimiz kerak. Haddan ortiq bosim va asabiylashish o‘yin paytida to‘g‘ri qarorlar qabul qilishga xalaqit beradi. Shu sababdan ham biz murabbiylar shtabi bilan birgalikda ortiqcha his-tuyg‘ularni kamaytirishga, futbolchilarga faqat o‘zlarining eng yaxshi o‘yinlarini ko‘rsatishlari uchun qulay muhit yaratishga harakat qilyapmiz”, – dedi Jaloliddin Masharipov.
Tajribali futbolchi o‘zining shaxsiy jismoniy holati haqida ham gapirar ekan, uning bu muhim o‘yinga to‘liq tayyor ekanligini ta’kidladi:
“Shaxsan o‘zimni juda yaxshi his qilyapman. Saudiya chempionati 15 mayda tugadi, shundan keyin ham ikki o‘yinda qatnashdim. Shu sababli tonusni yo‘qotmaslik uchun klubimda muntazam mashg‘ulotlarda qatnashib turdim. Hozir jismoniy jihatdan hech qanday qiyinchilik yo‘q. Sharoit va ob-havoga ham tezda ko‘nikib oldik. Shu jihatdan ham biz BAAga qarshi uchrashuvga to‘liq tayyor holdamiz”, – deb qo‘shimcha qildi Masharipov.
O‘zbekiston milliy jamoasi so‘nggi o‘yinlarda o‘zining ishonchli o‘yini bilan muxlislarni xursand qilmoqda va BAA bilan kechadigan bellashuvda ham muvaffaqiyat qozonib, muddatidan oldin mundial yo‘llanmasini qo‘lga kiritishni maqsad qilgan.
Futbolchilarimizdan biri bo‘lgan Jaloliddin Masharipov ham muxlislarning qo‘llab-quvvatlashlari jamoaga qo‘shimcha kuch berishiga ishonadi va BAAga qarshi uchrashuvda har bir futbolchi o‘zining maksimal imkoniyatlarini namoyish etishiga va’da bermoqda.
Ushbu muhim o‘yinda O‘zbekiston milliy jamoasining zafar quchishi barchamiz uchun katta bayram bo‘lishi shubhasiz!
