Ronalduning Al-Nasr bilan yangi shartnomasi va shartlari ochiqlandi
Krištianu Ronaldu «Al-Nasr» jamoasi bilan keyingi ikki yil uchun yangi shartnoma imzoladi. Bu haqida Euro-football.ru xabar berdi.
The Sun nashrida yulduz futbolchining yangi mehnat shartnomasidagi moliyaviy shartlar haqida ma’lumot berildi. Ma’lumotlar funt sterlingda keltirilgan, ammo qulaylik uchun hozirgi kurs bo‘yicha yevroga aylantirib taqdim etamiz. Yillik asosiy maoshi 209 million yevroni tashkil qiladi.
Shartnoma imzolash bonusi 28,75 million yevro, biroq jamoada qolsa, ikkinchi yilda bu summa 44,6 million yevrogacha oshadi. Har bir gol uchun bonus 93,9 ming yevro, ikkinchi mavsumda esa bu miqdor 20 foizga ko‘payadi.
Golga uzatma berganda beriladigan bonus 47 ming yevro, bu ham ikkinchi yil 20 foizga ko‘tariladi. «Al-Nasr» chempionligini qo‘lga kiritganda Ronaldu 9,4 million yevro bonus oladi. Chempionatning eng to‘purar futbolchisi unvoni uchun 4,7 million yevro ajratilgan.
Shuningdek, Osiyo Chempionlar ligasida ishtirok etish va g‘alaba qozonish uchun qo‘shimcha 7,63 million yevro bonus taqdim etiladi. Bundan tashqari, Ronaldu «Al-Nasr»ning 15 foiz aksiyalarini oladi, bu aksiyalar qiymati taxminan 38,7 million yevroga teng. Futbolchining xizmatida 16 kishi ishlaydi: 3 haydovchi, 4 uy bekasi, 2 oshpaz, 3 bog‘bon va 4 xavfsizlik xodimi.
Jamoa Ronaldu uchun shaxsiy samolyot xarajatlarini 4,69 million yevro miqdorida qoplaydi. Shuningdek, Saudiya va Osiyo kompaniyalari bilan 70,4 million yevro miqdorida homiylik bitimlari tuzilishi va’dasi berilgan.
Ushbu shartnomalar yulduz futbolchining nafaqat maydondagi muvaffaqiyatlarini, balki moliyaviy barqarorligini ham ta’minlaydi.
