Sun’iy intellekt texnologiyalari sohasida jahon yetakchilaridan biri bo‘lgan AQSHning OpenAI kompaniyasi, avvalroq rejalashtirilganidan farqli ravishda, notijorat tashkilot boshqaruvida qoladigan bo‘ldi. Bu haqda kompaniyaning bosh direktori Sem Altman o‘z xodimlariga yuborgan rasmiy maktubida ma’lum qildi.
Maktubda qayd etilishicha, OpenAI notijoriy jamoat manfaatlari bo‘yicha mas’uliyati cheklangan jamiyat shaklidan fuqarolik jamiyati manfaatlarini ta’minlashga yo‘naltirilgan korporativ boshqaruv tizimiga o‘tadi. Shu bilan birga, kompaniyaning ustidan nazorat to‘liq notijoriy boshqaruv organi qo‘lida bo‘lib qolishi belgilab qo‘yilgan.
«Biz bu muhim qarorni qabul qilishdan avval fuqarolik jamiyati yetakchilarining tavsiyalarini tingladik. Shuningdek, Kaliforniya va Delaver shtatlarining bosh prokurorlari idoralari bilan muzokaralar olib bordik. Natijada OpenAI notijoriy tuzilma boshqaruvida qoladigan bo‘ldi. Microsoft hamda yaqinda tayinlangan notijoriy komissiya a’zolari bilan bu yo‘nalishdagi keyingi muzokaralar davomida barcha rejalarni batafsil ishlab chiqishni intizorlik bilan kutmoqdamiz», — deb yozadi Sem Altman o‘z maktubida.
Qayd etilishicha, avvalroq kompaniya rahbariyati xodimlarni ishda saqlab qolish hamda yangi investorlarni jalb qilish uchun OpenAI tuzilmasini to‘liq tijoriy boshqaruv shakliga o‘tkazishni rejalashtirgan edi. Biroq bu rejadan voz kechildi va kompaniya o‘zining dastlabki notijoriy maqsadlariga sodiq qoladigan bo‘ldi.
OpenAI sun’iy intellekt texnologiyalarini insoniyat manfaati uchun ishlatishni o‘zining bosh maqsadi qilib belgilagan. 2015 yilda tashkil etilgan bu kompaniyaning asoschilaridan biri mashhur tadbirkor Ilon Mask bo‘lgan edi. Dastlab kompaniyaga Ilon Mask va Sem Altman birgalikda raislik qilishgan. Shu bilan birga, uning bosh vazifasi insoniyat foydasi uchun sun’iy intellekt sohasida tadqiqotlar olib borish deb belgilangan edi.
Biroq 2018 yilda OpenAI faoliyati tijoriylashganidan norozi bo‘lgan Ilon Mask uni tark etgan va kompaniya to‘liq Sem Altman boshqaruviga o‘tgan. Kompaniyaning strategik hamkori Microsoft korporatsiyasi bo‘lib, u keyingi yillarda OpenAI ga katta hajmda investitsiya kiritgan va shuning ortidan kompaniya sun’iy intellekt sohasida yetakchi o‘ringa chiqqan.
Kompaniya rahbariyatining yangi qarori esa jamoatchilikda ijobiy qabul qilindi. Mutaxassislarning fikricha, OpenAI notijoriy tuzilma sifatida qolishi, uning ilmiy tadqiqotlarga ko‘proq ahamiyat qaratishi va sun’iy intellekt texnologiyalarini xavfsiz, foydali shaklda rivojlantirish imkoniyatlarini kengaytiradi.
Hozirgi kunda OpenAI kompaniyasi GPT modellari, xususan ChatGPT mahsuloti bilan butun dunyoga mashhur bo‘lib, millionlab foydalanuvchilarning kundalik hayoti va ish jarayonini yengillashtirib kelmoqda.
Endi kompaniyaning yangi qaroridan keyin, bu texnologiyalarni yanada takomillashtirish va insoniyat manfaati yo‘lida xavfsiz foydalanish masalasi yanada yuqori darajadagi nazorat ostiga olinishi kutilmoqda.
