O‘zbekiston Respublikasi Iqtisodiyot va moliya vazirligi avtotransport vositalari egalarining huquqlarini yanada mustahkamlash maqsadida yangi qaror loyihasini ishlab chiqdi. Bu haqida Upl.uz xabar berdi.
Ushbu hujjat SOVAZ portalida jamoatchilik muhokamasiga qo‘yilgan bo‘lib, avtomototransport vositalari bilan bog‘liq bitimlarni rasmiylashtirish tartibini belgilovchi amaldagi nizomga o‘zgartirishlar kiritishni nazarda tutadi. Loyihada eng muhim yangilik sifatida ishonchnoma orqali transport vositasini O‘zbekiston hududidan chiqarish huquqining majburiy ko‘rsatilishi belgilandi.
Yangi ishonchnoma shakli hamda uni rasmiylashtirish uchun taqdim etiladigan so‘rovnomada bu imkoniyat aniq va alohida band bilan tartibga solinadi. Ushbu o‘zgarishlarning asosiy maqsadi ishonchnomalarni rasmiylashtirish jarayonida oshkoralik va ishonchlilikni oshirishdan iborat.
Shu bilan birga, bu chora transport vositalarining egalarining roziligisiz chet elga olib chiqilishining oldini olishga xizmat qiladi. Avtomobil egalari o‘z mulklarini himoyalangan va nazorat ostida ekanligiga ishonch hosil qila oladilar.
