Farg‘ona viloyati hokimiyati hududda yuk tashuvchi katta yuk avtomobillari harakatini vaqtinchalik tartibga soluvchi qarorni tasdiqladi. Bu haqida Upl.uz xabar berdi.
Ushbu hujjat 30 iyul kuni milliy portalda jamoatchilik eʼtiboriga taqdim etildi. Qaror viloyat avtomobil yo‘llari boshqarmasi tomonidan yo‘l qoplamini himoya qilish maqsadida, yozgi davrda kuzatiladigan qattiq issiqlik sharoitlarini inobatga olgan holda ishlab chiqildi.
Qarorga muvofiq, umumiy foydalanishdagi avtomobil yo‘llari hamda shahar va qishloq ko‘chalarida og‘ir yuk avtomobillarining harakati vaqtincha taqiqlanadi. Bu cheklovlar har kuni soat 8:00 dan 18:00 gacha amal qiladi.
Belgilangan tartib 20 iyuldan 20 oktabrgacha davom etadi. Yangi qoidalarga yuk o‘qiga tushuvchi yuk hajmi 10 tonnadan oshadigan transport vositalari, shuningdek oson yonuvchi, portlovchi yoki atrof-muhit uchun xavfli modda tashiydigan avtomobillar kiradi.
Bundan tashqari, xavfsizlik talablariga javob bermaydigan texnika ham harakatiga cheklov qo‘yiladi. Qarorda favqulodda xizmatlar, masalan, yong‘in xavfsizligi, tez tibbiy yordam, shuningdek kommunal va sanoat korxonalari texnikasiga cheklovlar qo‘llanilmasligi belgilangan.
Mahalliy tadbirkorlik sub’yektlari mahsulotlarini tashuvchi yuk avtomobillari harakati uchun maxsus ruxsatnoma talab etiladi. Ushbu qarorning bajarilishini yo‘l harakati xavfsizligi boshqarmasi nazorat qiladi.
Ular viloyat va tuman hokimliklari bilan hamkorlikda asosiy yo‘llarda vazn-o‘lchov punktlarini tashkil etadi. Shu bilan birga, aholi va tashuvchilar orasida tushuntirish ishlarini olib borib, yangi tartibning zarurligini yetkazish vazifasi qo‘yilgan.
Asfalt yo‘l qoplamasi +50 daraja issiqlikda yumshay boshlaydi. Quyosh nurlari ostida harorat +60-70 darajagacha ko‘tarilishi mumkin, bu esa og‘ir yuk avtomobillari ostida yo‘l yuzasining deformatsiyasiga olib keladi.
Shu sababli vaqtinchalik cheklov joriy qilinmoqda.
