Ijtimoiy tarmoqlarda 472-raqamli marshrut avtobusining yomon holatini ko‘rsatgan videorolik keng tarqalganidan so‘ng, mas’ul organlar tezkor tekshiruv o‘tkazdi. Bu haqida Upl.uz xabar berdi.
Ma’lum bo‘lishicha, ushbu avtobus Toshkent viloyatining qishloq hududlari uchun mo‘ljallangan marshrutga tegishli ekan. Tekshiruv natijasida aniqlangan texnik kamchiliklar va sanitariya talablariga zid holatlar darhol bartaraf etildi.
Avtobus operatori bajarilgan ishlar bo‘yicha fotohisobot taqdim etdi va avtobus yana marshrutga chiqdi. Bundan tashqari, shahar va qishloq hududlaridagi barcha yo‘lovchi transport vositalarining, shu jumladan xususiy operatorlar xizmatidagi transportning texnik holatiga nazorat kuchaytirildi.
Hokimiyatlar fuqarolarning faolligini yuqori baholab, bunday murojaatlar jamoat transporti sifatini yaxshilashda muhim ahamiyatga ega ekanligini ta’kidladi. 472-raqamli marshrutning katta qismi Toshkent shahar hududidan o‘tishi hisobga olinsa, uning qishloq hududi maqomi eskirgan va noqulay transport vositalarini ishlatishga asos bo‘la olmaydi.
Havo harorati +42 daraja bo‘lganida, konditsioneri ishlamaydigan, issiq salonli, oynalari buzilgan va o‘tiradigan joylari eskirgan avtobusda sayohat qilish qiyinligi aniq. Endi faqat yuzaki ta’mir qilish va eskirgan transportni “yopish” emas, balki uni to‘liq ekspluatatsiyadan chiqarib, xavfsizlik va qulaylik standartlariga javob beradigan zamonaviy avtobuslar bilan almashtirish vaqti keldi.
Bu chora-tadbirlar yo‘lovchilarning qulayligi va xavfsizligini ta’minlashga xizmat qiladi.
