Alyaskadagi Kichik Diomid oroli aholisi Rossiya ushbu hududni qo‘shib olishidan xavotirlanib, rus tilini o‘rganishni boshladi, deb The Economist nashri xabar berdi. Jurnalning ma’lum qilishicha, orol Rossiyaning eng sharqiy nuqtasi — Ratmanov orolidan bor-yo‘g‘i 3,5 kilometr uzoqlikda joylashgan.
Jurnalistlar Kichik Diomidda yashovchi taxminan 100 nafar aholining kundalik hayotini tasvirlab, orolni Rossiya va AQSH o‘rtasidagi “Arktika jangining oldingi chizig‘i” deb atashgan.
«Orolning ba’zi aholisi Rossiya qachondir uni qo‘lga kiritishidan xavotirlanib, rus tilini o‘rganmoqda», — deyiladi xabarda.
Qish faslida ikki orol o‘rtasida muz ustida piyoda yurib yarim soatda yetib borish mumkin. Ilgarilari, xususan sovuq urush boshlangunga qadar, bunday aloqalar keng tarqalgan edi. Ammo hozirgi murakkab geosiyosiy vaziyat tufayli bu aloqalar to‘xtab qolgan va orol aholisi faqat bir-birini uzoqdan kuzatish bilan cheklanmoqda.
«Biz ularni kuzatamiz, ular esa bizni», — deydi Kichik Diomidda yashovchi Edvard ismli fuqaro.
Shu bilan birga, mahalliylar orol sekinlik bilan, yiliga 1-2 metrga Rossiya oroli tomon harakatlanayotganini aytishmoqda. «Orollar nimanidir to‘g‘irlashga urinmoqda. Balki ular bir-birini yaxshi ko‘rar?», — deydi mahalliy aholi vakili.
👍 0❤️ 0😂 0😢 0😡 0
