Afg‘oniston va Pokiston chegarasida qurolli to‘qnashuvlar yuz berdi
12 oktyabr, yakshanba kuni tushdan keyin Afg‘oniston va Pokiston chegarasida vaziyat keskinlashdi. Bu haqda Zamin.uz xabar berdi.
AFP agentligining ikki davlat manbalariga tayanib berishicha, chegarada qurolli to‘qnashuvlar yuz berdi. Bu mojaro natijasida o‘nlab odamlar halok bo‘ldi, biroq aniq raqamlarni mustaqil tekshirish imkoniyati hozircha yo‘q.
Kobuldagi hokimiyatni qo‘lga olgan Tolibon harakati vakili Zabiҳulloh Mujohidning so‘zlariga ko‘ra, to‘qnashuvlarda 58 nafar Pokiston askari halok bo‘lgan. Islomobod esa bu ma’lumotni rad etdi.
Tolibon bayonotida Afg‘oniston kuchlari qo‘shni davlatning 20 ta chegara postini vaqtincha egallab olgani qayd etildi. Mujohid bu harakatni javob chorasi deb atadi va to‘qqiz afg‘on askari ham halok bo‘lganini bildirdi.
Shu bilan birga, Pokiston ommaviy axborot vositalari xavfsizlik manbalariga tayanib, Afg‘oniston tomonida ham ko‘plab qurbonlar borligini xabar qildi. Ularning ma’lumotlariga ko‘ra, Pokiston qo‘shinlari 19 ta afg‘on chegara postini nazoratga olgan.
Bu haqda AFP agentligi ham ma’lum qildi. Kecha ikki davlat chegarasida mojaro yana kuchaydi.
Tolibon va Pokiston armiyasi o‘rtasida shiddatli otishmalar yuz berdi. Bu voqealardan ikki kun oldin Kobul Islomobodni Afg‘oniston hududiga havo zarbalari berganlikda ayblagan edi.
9 oktyabr kuni Kobul va janubiy-sharqiy hududlarda portlashlar sodir bo‘lgandan so‘ng, Afg‘oniston Mudofaa vazirligi Pokistonni mamlakat suverenitetini buzishda aybladi. Pokiston bu ayblovlarni rad etdi va Kobulni o‘z hududida Pokiston Tolibonlariga boshpana berishni to‘xtatishga chaqirdi.
Pokiston hukumati Tolibon bilan bog‘liq qurolli guruhlarni 2021 yildan beri yuzlab pokistonlik askarlarni o‘ldirganlikda ayblamoqda. Rasmiy ma’lumotlarga ko‘ra, Pokistonlik Tolibon a’zolari Afg‘onistonda tayyorgarlikdan o‘tadi va afg‘on hamfikrlarini qo‘llab-quvvatlaydi.
Pokiston razvedkasi dpa agentligiga ma’lum qilishicha, Islomobod amalga oshirgan zarbalar Tolibon yetakchisi Nur Vali Mehsubga qaratilgan. Kuzatuvchilar fikricha, Afg‘oniston va Pokiston o‘rtasidagi bu ziddiyat nafaqat harbiy, balki siyosiy jihatdan ham yangi xavfli bosqichni boshlashi mumkin.
Chegara hududidagi beqarorlik butun mintaqada tinchlik uchun jiddiy tahdid hisoblanadi.
