Rossiyaning dron hujumi: Ukrainada avtobus dron zarbasiga uchradi, ko‘plab qurbonlar bor

^{Foto: Telegram / dnipropetrovskaODA}
Ukrainaning Dnepropetrovsk viloyatidagi Marganes shahri Rossiya qurolli kuchlarining dronlar bilan amalga oshirgan hujumiga uchradi. Bu haqda viloyat ma’muriyati rahbari Sergey Lisak ma’lum qildi.

Uning xabar berishicha, 23 aprel kechasi sodir bo‘lgan hujum oqibatida korxona ishchilarini tashiydigan avtobus dron zarbasiga uchragan. Achinarlisi, voqea natijasida 9 kishi qurbon bo‘ldi, yana 30 kishi turli darajada jarohat olgan.

Bundan avvalroq Sergey Lisak tunda Rossiyaga tegishli to‘rtta uchuvchisiz samolyot urib tushirilgani va ushbu voqealar natijasida ikki kishi jarohatlanganini xabar qilgan edi.

Ukraina OAVlarining tarqatgan ma’lumotlariga ko‘ra, 23 aprelga o‘tar kechasi Rossiya harbiylari tomonidan dronlar bilan bir qator hududlarga hujum uyushtirilgan. Xususan, Poltava viloyatiga berilgan zarbalar oqibatida turar-joy binolaridan biri yaqiniga dron qulab tushgan va uch kishi jarohatlangan.

Shuningdek, Odessa viloyatida ham turar-joy binolari va bir korxona hududida yong‘in kelib chiqqan, bu yerda ikki kishi jabrlangan. Kiyev viloyatining Brovarskiy tumanida esa dron bo‘laklari qulashi natijasida mehmonxona va restoran majmuasida yong‘in sodir bo‘lgan, baxtiga hech kimga zarar yetmagan. Bu haqda Ukraina favqulodda vaziyatlar davlat xizmati ma’lum qilmoqda.

Hozircha Rossiya hukumati ushbu hodisalar bo‘yicha biror rasmiy munosabat bildirgani yo‘q.

Ukrainada sodir bo‘lgan ushbu mudhish hujumlar xalqaro hamjamiyatning katta e’tiboriga sabab bo‘lmoqda. Hozirda hududlardagi zarar ko‘rgan binolar va infratuzilmalarni tiklash ishlari boshlab yuborilgan.

Rossiya-Ukraina o‘rtasidagi ushbu jangovar harakatlar natijasida ko‘plab tinch aholi qurbon bo‘lmoqda va jabr ko‘rmoqda. Shuning uchun ham xalqaro tashkilotlar mojaroning tezroq hal etilishiga umid bildirib, tomonlarni vazminlik va tinchlikka chaqirmoqda.