Kreml kelishuvni muhokama qilishda «nyuanslarni hisobga olish» muhim ekanini bildirdi

Rossiyaning Ukrainaga qarshi urushini 30 kunga to‘xtatish bo‘yicha kelishuv masalasida mazmunli muhokama o‘tkazish «barcha tafsilot va nyuanslarni hisobga olmasdan turib» amalga oshirilishi mumkin emas. Bu haqda Rossiya prezidenti Vladimir Putinning matbuot kotibi Dmitriy Peskov ma’lum qildi, deb yozmoqda TASS agentligi 9 may kuni.

Peskov Kreml uzoq muddatli o‘t ochishni to‘xtatish tashabbusini ilk bor AQSH prezidenti Donald Tramp tomonidan taklif qilingan paytdayoq qo‘llab-quvvatlaganini eslatdi. Biroq, uning fikricha, «o‘t ochishni to‘xtatish atrofida ko‘plab tafsilotlar mavjud va bu masalada ularga aniq javob topmasdan turib, muhokamani mazmunli tarzda olib borish mushkul».

Shu bilan birga, Peskov aprel oyining oxirida ham ushbu «nyuanslar»ni hisobga olmasdan turib, urushni vaqtinchalik to‘xtatish haqida gapirishning iloji yo‘qligini ta’kidlagan edi.

Ukraina prezidenti Volodimir Zelenskiy esa 7 may kuni qilgan murojaatida Kiyevning Rossiya bilan eng kamida 30 kunlik o‘t ochishni to‘xtatish taklifi hali ham kuchda ekanini ma’lum qildi. «Biz diplomatiyaga yo‘l ochishi mumkin bo‘lgan bu taklifni ortga qaytarish niyatida emasmiz», — dedi Ukraina yetakchisi.

O‘sha murojaatida Zelenskiy, Rossiya tomonidan faqatgina Ukraina hududiga «yangi zarbalar» uyushtirilayotgani, bu esa «urushning haqiqiy manbasi kim ekanini har bir shaxsga tushunarli va ravshan ko‘rsatib berishini» ta’kidlab o‘tdi.

Hozirda xalqaro hamjamiyat mazkur masala bo‘yicha vaziyatning yanada rivojlanishini diqqat bilan kuzatmoqda.