Qizining peshonasiga tuxum urgan ona TikTok trendi qurboni bo‘ldi: 2 ming dollar jarima to‘laydi!
Shvetsiyaning Helsingborg shahrida yashovchi 24 yoshli ayol TikTok'da ommalashgan hazil uchun sudga tortilib, katta miqdorda jarimaga mahkum etildi. U qizining peshonasiga tuxum urib chaqqani aks etgan videoni ijtimoiy tarmoqqa joylagan edi.
Mazkur voqea o‘tgan yil sodir bo‘lgan bo‘lib, ayol o‘z qizi bilan birgalikda olmali pirog tayyorlash jarayonini videoga tushirishga qaror qilgan. Biroq tasvirga olish vaqtida ayol yumor sifatida tuxumni kutilmaganda qizining peshonasiga urib chaqqan. Videoda kichik qizcha hayratdan qattiq ajablanib, onasiga norozi qaragani aks etgan. Bolaning bunday hazildan ko‘ngli qolgani yaqqol ko‘rinib turgan bo‘lsa-da, ayol va videoda qatnashgan boshqa bir ishtirokchi qizchaning holatiga qaramay, kulib yuborganlar.
TikTok'ka joylangan bu videoni 100 mingga yaqin odam ko‘rgan. Biroq rolikni ko‘rib, bunday harakatni bolaga nisbatan "zo‘ravonlik va tahqirlash" deb hisoblagan foydalanuvchilardan biri mahalliy politsiyaga murojaat qilgan. Tergovdan so‘ng ayolga "bolalarga nisbatan zo‘ravonlik qilish" aybi qo‘yilgan va u sudga chaqirilgan.
Ayol sudda qilgan harakati shunchaki hazil ekanini va TikTok tarmog‘ida bu kabi videolar ommalashganini ta’kidladi. Uning fikricha, ko‘plab ota-onalar ham shunday hazillarni tasvirga olgan va bu tarmoq trendi hisoblanadi.
Biroq prokuror bu vaziyatni jiddiy baholadi va ayolning qilgan ishini «bolaning qadr-qimmatiga tajovuz» sifatida baholadi. Sudya ham bunday harakatni "o‘ylamay qilingan va bolaga nisbatan nosog‘lom ta’sir ko‘rsatuvchi harakat" deb hisobladi.
Natijada, sud onasini aybdor deb topib, unga 20 ming shved kronasi (taxminan 2 ming dollar) miqdorida jarima to‘lash jazosini tayinladi.
Bu voqea ijtimoiy tarmoqlardagi hazillarning bolalarga nisbatan qanday oqibatlarga olib kelishi mumkinligini yana bir bor ko‘rsatib berdi. Shuning uchun ham, ota-onalarni ijtimoiy tarmoqlardagi videolarni tayyorlash jarayonida ehtiyotkor va mas’uliyatli bo‘lishga chaqiriladi.
Zamin.uz tahririyati o‘z o‘quvchilariga ijtimoiy tarmoqlardan foydalanishda mas’uliyatni unutmaslikni maslahat beradi.
