Putin: “Ukraina 30 ming odamni zo‘rg‘a topyapti, bizga 60 ming kishi o‘zimizga kelishmoqda” — bu chindan shundaymi?

Jahon hamjamiyatini hayratga solgan bayonot Rossiya prezidenti Vladimir Putindan keldi. Uning so‘zlariga ko‘ra, Rossiya frontga har oy 50–60 ming nafar ixtiyoriy xizmatchilarni jo‘natmoqda. Ukraina esa, u aytganidek, zo‘rg‘a 30 ming odamni safarbar qilmoqda.

Biroq, bu raqamlar G‘arb razvedka xizmatlari tomonidan rad etilmoqda. Ular Rossiyada har oyda chaqirilayotgan askarlar soni 30–40 ming atrofida ekanini aytmoqda. Asosiy rag‘batchi omillar: katta pul mukofotlari va qamoqxonalardan mahbuslarni safarbar qilish.

Britaniya razvedkasi ma’lumotiga ko‘ra, urush boshlangandan buyon Rossiya armiyasida halok bo‘lgan va yaralanganlar soni qariyb 1 million nafarga yetgan. Biroq shu yo‘qotishlarga qaramay, 2024 yil yakunida Rossiya qo‘shinlari Ukraina hududining atigi 0,5 foizini egallay olgan.

Moskvada nimalar bo‘layapti?

• The Economist'ga ko‘ra, Rossiya Mudofaa vazirligi va Genshtabi Kremlga yangi to‘lqinli safarbarlikni boshlash bo‘yicha bosim o‘tkazmoqda;
  
• ISW tahlilchisi Jorj Barros: “Moskvadagi mobilizatsiya hozirgi sur’atda borsa, frontdagi harakatni saqlash uchun 12–16 oy vaqt qolgan”;
  
• Rossiya iqtisodiy muammolar, inson salohiyati yetishmasligi va resurs tanqisligi bilan yuzma-yuz.
  

2022 yildagi qisman safarbarlikdan so‘ng taxminan 650 mingdan 1,1 milliongacha rossiyalik mamlakatni tark etdi. The Bell nashri hisobotiga ko‘ra, ularning kamida 666 ming nafari Rossiyaga qaytmagan.

Zamin.uz tahririyati kuzatmoqda: Safarbarlik, frontdagi yo‘qotishlar va Kremlning navbatdagi qarorlari — yaqin haftalarda Rossiyaning harbiy strategiyasida nimalar o‘zgaradi? Biz kuzatamiz — siz bilan bo‘lamiz.