Donald Tramp Zelenskiyni diktator deb ataganiga «ishonmayapti»

^{Foto: Yuri Gripas/Pool via CNP/AdMedia/picture alliance}
Donald Tramp 27 fevral, payshanba kuni Volodimir Zelenskiy «diktator» ekani haqidagi avvalgi fikridan qaytdi. «Men shunday dedimmi? Ishonmayman. Keyingi savol», — deb javob berdi AQSH prezidenti Oq uyda Britaniya bosh vaziri Kir Starmer bilan uchrashuvda jurnalistning savoliga.

19 fevral kuni Tramp o‘zining Truth Social platformasidagi postida Ukraina prezidenti o‘z mamlakatida «saylov o‘tkazishdan bosh tortgani» uchun «saylovlarsiz diktator» ekanini yozgan. «Zelenskiy shoshilsa yaxshi bo‘ladi, aks holda uning mamlakati qolmaydi», deb qo‘shimcha qildi Amerika rahbari. O‘sha kuni Donald Tramp Mayamidagi mitingda nutq so‘zlab, bu bayonotni takrorladi.

24 fevral kuni AQSH prezidenti Vladimir Putinni diktator deb atash mumkinmi, degan savolga javoban: «Men bunday so‘zlarni o‘ylamasdan turib ishlatmayman», dedi va Rossiya rahbarini bunday deb atamadi.

Trampning bayonotlari tanqid qilindi

Oq uy rahbarining bayonotlari Ukrainada ham, xorijda ham tanqid qilindi. Xususan, Germaniya kansleri Olaf Shols AQSH prezidentining so‘zlarini «xato va xavfli» deb atadi. «Haqiqat shuki, Volodimir Zelenskiy Ukraina davlatining qonuniy saylangan rahbari hisoblanadi. Urush sharoitida to‘g‘ri saylovlar o‘tkazishning iloji yo‘qligi Ukraina Konstitutsiyasi va saylov qonunchiligi qoidalariga to‘g‘ri keladi. Va buning aksini da’vo qilishga hech kimning haqqi yo‘q», — deya ta’kidladi Germaniya hukumati rahbari.

Yevrokomissiya Trampning Zelenskiyga og‘zaki hujumiga izoh berdi: «Bizda bu masala bo‘yicha aniq pozitsiya bor: prezident Zelenskiy erkin, adolatli va demokratik saylovlarda qonuniy ravishda saylangan. Ukraina demokratik davlat, Putin Rossiyasi esa unday emas». Birlashgan Millatlar Tashkiloti, shuningdek, Volodimir Zelenskiy «to‘g‘ri o‘tkazilgan saylovlardan so‘ng o‘z lavozimida» ekanligini tasdiqladi.