Jizzax viloyatida fuqarolarni chet elga ishga jo‘natish bahonasida yirik miqdorda pul talab qilgan shaxs qo‘lga olindi. Bu haqda viloyat Ichki ishlar boshqarmasi rasmiy ma’lumot berdi.
Ma’lum qilinishicha, Sharof Rashidov tumanida yashovchi N.B.Q. ismli shaxs Zarbdor tumanida yashovchi A.A.D.ni Meksika orqali AQSHga ishga joylashtirishni va’da qilgan. Ushbu “xizmat” uchun u 200 million so‘m talab qilgan. Summa tarkibida 11 200 AQSH dollari va 50 million so‘m naqd pul bo‘lgan.
N.B.Q. ana shu pullarni qabul qilib olish paytida huquqni muhofaza qiluvchi organlar tomonidan dalil ashyolar bilan birga qo‘lga olingan.
Hozirda ushbu holat yuzasidan tergovgacha bo‘lgan surishtiruv ishlari olib borilmoqda. Qonunga muvofiq, bunday harakatlar jinoiy javobgarlikka sabab bo‘lishi mumkin.
So‘nggi paytlarda ko‘paygan soxta “ishga jo‘natish” holatlari
So‘nggi yillarda aholi o‘rtasida chet elda ishlash orqali tez va oson daromad topish umidi kuchaygan. Bu esa ayrim shaxslar tomonidan foyda olish vositasiga aylanib bormoqda. Turli “posrednik”lar, agentliklar yoki shaxsiy aloqalar asosida ishga jo‘natishni va’da qilish holatlari ko‘paymoqda.
Huquqni muhofaza qiluvchi idoralar aholini bunday soxta va’dalarga uchmaslikka, faqat rasmiy yo‘llar orqali ishga jo‘nashga chaqirmoqda.
Zamin.uz tahririyati murojaat qiladi: agar sizdan ham shubhali shaxslar xorijda ish taklif qilib, katta miqdorda pul talab qilsa — bu haqda tegishli organlarga murojaat qiling. Sizning oilaviy boyligingiz va xavfsizligingiz — eng asosiy ustuvorlikdir.
