O‘zbekiston davlat qarzi 43 milliard dollarga yetdi
Iqtisodiyot va moliya vazirligi tomonidan e’lon qilingan so‘nggi hisobotga ko‘ra, 2025 yilning 1 iyul holatiga O‘zbekistonning davlat qarzi 43 milliard 376 million dollarga yetdi. Bu haqida Zamin.uz xabar berdi.
Bu ko‘rsatkich mamlakat iqtisodiyoti va moliyaviy barqarorligi nuqtai nazaridan muhim ahamiyatga ega. Umumiy qarzning 36 milliard 414 million dollari tashqi qarz, 6 milliard 962 million dollari esa ichki qarz hisoblanadi.
Yalpi ichki mahsulotga nisbatan davlat qarzi ulushi o‘tgan yilning mos davriga nisbatan 1,8 foizga oshib, 34,2 foizni tashkil etdi. 2024 yilning 1 iyulida davlat qarzi 37 milliard 241 million dollar bo‘lgan bo‘lsa, bir yil ichida qarz miqdori 16,5 foizga ko‘paygan.
Tashqi qarzning katta qismi yirik moliya institutlari hisobiga to‘g‘ri keladi. Jumladan, Jahon banki 7,8 milliard dollar, Osiyo taraqqiyot banki 7,4 milliard dollar, xalqaro evrobondlar orqali jalb qilingan mablag‘ 5,7 milliard dollar, Xitoy moliya tashkilotlari 3,8 milliard dollar, Yaponiya moliya institutlari 3,2 milliard dollar, Osiyo infratuzilma investitsiyalari banki 1,7 milliard dollar, Fransiya moliya tashkilotlari 1,1 milliard dollar, Islom taraqqiyot banki 935 million dollar, Koreya moliya institutlari 750 million dollar, Xalqaro valyuta jamg‘armasi 642 million dollar, Germaniya davlat banki 481 million dollar, Yevropa tiklanish va taraqqiyot banki 401 million dollar, boshqa manbalar esa 2,5 milliard dollarni tashkil etadi.
Hisobotda qayd etilishicha, tashqi qarzning taxminan 47 foizi, ya’ni 16,9 milliard dollari davlat byudjetining barqarorligini ta’minlash va qo‘llab-quvvatlashga yo‘naltirilgan. Bundan tashqari, 5,9 milliard dollar yoqilg‘i va energetika sohasiga, 3,1 milliard dollar qishloq va suv xo‘jaligiga, 2,9 milliard dollar transport infratuzilmasiga, 3 milliard dollar esa uy-joy va kommunal xizmatlarga ajratilgan.
Shu bilan birga, davlat qarzining keskin oshishi mamlakat iqtisodiy siyosatini qayta ko‘rib chiqish, tashqi moliyaviy resurslarni samarali boshqarish va ichki iqtisodiy barqarorlikni mustahkamlash zarurligini yana bir bor ko‘rsatmoqda (manba: Iqtisodiyot va moliya vazirligi).
