O‘zbekistonda ijtimoiy himoya tizimini takomillashtirishga qaratilgan yangi tartib va qoidalar joriy etildi. Bu haqda Zamin.uz xabar berdi.
Endilikda shaharsozlik hujjatlarini ishlab chiqishda nogironligi bo‘lgan shaxslar uchun mos sharoitlar yaratish majburiy talablardan biri sifatida belgilandi. Agar ushbu talab inobatga olinmasdan loyiha tasdiqlansa, bu holat ma’muriy javobgarlikka olib keladi.
Ekspert tashkilotlar tomonidan bunday loyihalarga ijobiy xulosa berilishi ham qonunbuzarlik hisoblanadi va buning uchun javobgarlik belgilangan. Yangi qonunchilikka ko‘ra, bunday qonunbuzarlik uchun aybdor shaxslarga bazaviy hisoblash miqdorining 50-70 baravarigacha jarima solinadi.
Ushbu chora-tadbirlar shahar infratuzilmasini barcha fuqarolar uchun qulay va ochiq qilishga qaratilgan muhim qadam sifatida baholanmoqda. Shuningdek, Ijtimoiy himoya milliy agentligi va uning bo‘linmalari faoliyatiga to‘sqinlik qilish yoki ularning talablarini bajarmaslik ham javobgarlikka sabab bo‘ladi.
Bunday holatlarda fuqarolarga bazaviy hisoblash miqdorining 3-5 baravarigacha, mansabdor shaxslarga esa 5-10 baravarigacha jarima qo‘llanadi. Ijtimoiy himoyaga muhtoj shaxslar uchun qonunda belgilangan imtiyozlarni ta'minlamaslik ham jazosiz qolmaydi.
Bu kabi qonunbuzarliklar uchun mas’ul shaxslarga bazaviy hisoblash miqdorining 3-5 baravarigacha jarima belgilangan. Yana bir yangilikka ko‘ra, ijtimoiy himoya reestriga kiritilgan oilalarga homiy tashkilotlar tomonidan beriladigan xayriya mablag‘lari (bazaviy hisoblash miqdorining 100 baravarigacha) daromad solig‘idan ozod qilinadi.
Bu qaror ehtiyojmand oilalarni qo‘llab-quvvatlashda homiylikni rag‘batlantirishga xizmat qiladi. Nogironligi bo‘lgan shaxslar, faxriylar, xotin-qizlar va bolalar manfaatlarini himoya qiluvchi jamoat tashkilotlarini davlat ro‘yxatidan o‘tkazishda davlat boji amaldagi stavkaning 50 foizi miqdorida olinadi.
Shuningdek, ijtimoiy himoya tizimini yanada samarali tashkil etish uchun Ijtimoiy himoya milliy agentligiga ijtimoiy xizmatlar va yordam ko‘rsatish maqsadida ma’lumotlarga ishlov berish vakolati berildi. Ushbu o‘zgarishlar tizimni ochiq va inson manfaatlariga yo‘naltirilgan holda rivojlantirishga qaratilgan.
