Milliy taomlarimizni dunyoga tanituvchilarga davlatdan katta qo‘llab-quvvatlash
O‘zbekistonda milliy turizm salohiyatini oshirish va o‘zbek brendini jahonga olib chiqishga qaratilgan yana bir muhim tashabbus amalga oshirildi. Prezident Shavkat Mirziyoyev imzolagan “2025–2026 yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida”gi farmonda xorijda o‘zbek milliy taomlarini targ‘ib qiluvchi tadbirkorlarga davlat tomonidan moddiy yordam ko‘rsatilishi belgilandi.
Subsidiyalar qanday beriladi?
Turizm qo‘mitasi tomonidan belgilangan yetakchi davlatlarda mahalliy tadbirkorlar tomonidan har yili kamida 50 ta o‘zbek milliy taomlariga ixtisoslashtirilgan restoran va umumiy ovqatlanish korxonalari tashkil etilganda, quyidagi xarajatlar davlat tomonidan bir martaga subsidiyalanadi:
- Ro‘yxatdan o‘tish, ruxsatnoma olish;
- Ijara va dizayn ishlari;
- Zarur uskunalar va anjomlar xarid qilish.
Bu xarajatlarning 50 foizi qoplab beriladi, lekin subsidiya miqdori 25 ming dollardan oshmasligi kerak.
Bundan tashqari, chet elda faoliyat yuritayotgan restoranlar uchun har yili 300 kggacha mahsulotni O‘zbekistondan yetkazib berish bilan bog‘liq transport xarajatlarining 50 foizi (maksimum 100 million so‘m) to‘lab beriladi.
Ushbu maqsadlar uchun har yili davlat budjetidan 30 milliard so‘m ajratiladi.
Media targ‘ibotga ham alohida mablag‘
2025 yil 1 sentyabrdan 2028 yil 1 yanvargacha mehmonxonalar va restoranlar tomonidan tayyorlangan videokontent, reklama roliklari, kliplar, anime materiallar va boshqa audiovizual targ‘ibot ishlari uchun sarflangan mablag‘larning 50 foizi (bir obyekt uchun 50 million so‘mgacha) ham Turizmni qo‘llab-quvvatlash jamg‘armasi tomonidan qoplab beriladi. Bu yo‘nalish uchun har yili 20 milliard so‘m ajratish rejalashtirilgan.
Mirziyoyevning shaxsiy tashabbusi
Eslatib o‘tamiz, 2 may kuni Prezident raisligida o‘tkazilgan yig‘ilishda xorijda o‘zbek milliy taomlarini keng targ‘ib qilayotgan restoratorlarni qo‘llab-quvvatlash zarurligi ta’kidlangandi. Davlat rahbari tegishli mutasaddilarga xorijda restoran ochish jarayonida ro‘yxatdan o‘tish, ruxsatnoma olish va boshqa tashkiliy masalalar bilan bog‘liq xarajatlarni subsidiyalash vazifasini topshirgan edi.
Zamin.uz tahririyatidan:
Bu farmon faqat tadbirkorlarni qo‘llab-quvvatlash vositasi emas, balki o‘zbek taomlari va madaniyatini jahonga tanitish yo‘lidagi katta qadamdir. Siz ham o‘zbek taomxonalarini chet elda ko‘paytirish g‘oyasini qanday baholaysiz?
