Yangi «Barselona» jamoasiga qo‘shilgan Markus Reshford asosiy tarkibda joy olish uchun Rafinya Dias bilan raqobatlashishi kerak bo‘ladi. Bu haqida Euro-football.ru xabar berdi.
Braziliyalik futbolchi hujumning chap qanotida bosh murabbiy Hans-Diter Flikning birinchi tanlovi hisoblanadi, ingliz futbolchisi esa zaxira variant sifatida ko‘riladi. O‘tgan mavsumda «ko‘k-bordo» jamoasida Rafinyaga muqobil deyarli bo‘lmagan, endi esa Reshford kelishi bilan bosh murabbiy 28 yoshli yulduzga ko‘proq dam olish imkonini yaratadi.
«Barselona» Markus Reshfordni «Manchester Yunayted» klubidan 2025/26 yilgi mavsum oxirigacha ijaraga oldi, shuningdek, futbolchini 30 million yevroga sotib olish huquqiga ega. Rasmiy kelishuv haqida e’lon chorshanba kuni qilinishi kutilmoqda.
Bu transfer jamoaning hujum chizig‘ini yanada kuchaytirishga xizmat qiladi va murabbiyga taktika bo‘yicha qo‘shimcha imkoniyatlar beradi. Reshfordning kelishi bilan «Barselona» hujumda yanada faol va samarali o‘yin ko‘rsatishi kutilmoqda.
