Chalxanoglu Inter rahbariyati bilan uchrashadi
Milanlik "Inter" futbol klubining yarim himoyachisi Hakan Chalxanoglu noqulay vaziyatga tushib qoldi. Bu haqida Euro-football.ru xabar berdi.
Jamoa Jahon klub chempionatidan chiqib ketgach, kapitan Lautaro Martines ba'zi futbolchilar jamoa uchun o‘ynashni istamayotganini aytdi. Shundan so‘ng, klub prezidenti Juzeppe Marotta argentinalik futbolchining aynan Chalxanoglu haqida gapirayotganini ochiqchasiga bildirdi.
Bu holatdan keyin ommaviy axborot vositalarida Chalxanogluning yaqin orada Turkiyaning "Fenerbaxche" yoki "Galatasaroy" jamoalariga o'tishi haqida mish-mishlar tarqaldi. Biroq yarim himoyachining agenti Turkiyaga ko‘chishi haqidagi ma'lumotlarni rad etdi.
Jurnalist Paskuale Guarro ma'lumotlariga ko‘ra, yangi mavsum boshlanishidan oldin Chalxanoglu Lautaro Martines va "Inter" rahbariyati bilan yuzma-yuz kelishi kerak. Futbolchilar klub rahbarlari bilan uchrashib, kelib chiqqan nizoni hal qilishga va oldingi voqealarni unutishga harakat qilishadi.
Ushbu uchrashuv jamoa ichidagi tinchlik va hamjihatlikni tiklashga qaratilgan. Shunday qilib, "Inter" klubi yangi mavsumga jamoaviy ruh va barqarorlik bilan kirishni maqsad qilgan.
