Jeyms Trafford Edersondan o‘rganganlarini ochiq aytdi

“Manchester Siti” jamoasining yangi darvozaboni Jeyms Trafford o‘zining jamoadoshi Ederson haqida fikr bildirdi. Bu haqida Euro-football.ru xabar berdi.

Trafford ikki yildan so‘ng o‘zining sobiq jamoasiga qaytdi. “Manchester Siti” klubi 22 yoshli darvozabon uchun “Byornli”ga 30 million yevrodan ortiq mablag‘ to‘ladi.

Jeyms Trafford o‘z intervyusida Ederson haqida iliq so‘zlar aytdi. U Edersonni juda iqtidorli va to‘p bilan ishlashda noyob darvozabon deb ta’kidladi.

Trafford 17 yoshida birinchi jamoa bilan mashg‘ulotlarni boshlagan paytda Edersonning harakatlaridan ilhom olganini va uning mahoratini o‘rganishga harakat qilganini aytdi. Trafford o‘z o‘yinini yanada takomillashtirish uchun Edersondan ko‘p narsani o‘rganganini bildirdi.

Shuningdek, u “Manchester Siti” jamoasining barcha darvozabonlari bilan birga ishlashdan mamnun ekanini, ular bir-birlarini rivojlanishga undashlarini ta’kidladi. O‘tgan mavsumda Jeyms Trafford “Byornli” safida Chempionship musobaqasida 45 uchrashuvda maydonga tushib, atigi 16 ta gol o‘tkazib yubordi.

Bu natija uning ishonchli darvozabon ekanini ko‘rsatadi.