Karles Peres it tishlashidan keyin shifoxonaga yotqizildi
Hujumkor yarim himoyachi Karles Peres yaqinda “Selta” jamoasidan Gretsiyaning “Aris” klubiga ijaraga o‘tdi. Bu haqida Euro-football.ru xabar berdi.
Saloniqi shahrida 27 yoshli futbolchi bilan noxush voqea yuz berdi. Karles Peres o‘z itini sayrga olib chiqqan vaqtda boshqa bir it uning itiga hujum qilgan.
Peres vaziyatga aralashishga uringan va natijada og‘riqli tishlash jarohatini olgan. Voqeadan so‘ng Karles Peres shifoxonaga olib borildi, biroq tez orada u uy sharoitida davolanish uchun chiqarib yuborildi.
Shifokorlar futbolchining sog‘ayish jarayonini muntazam nazorat qilib boradilar. Dastlab ayrim manbalarda Peresning ahvoli og‘ir ekani haqida xabarlar tarqalgan edi, biroq bu ma’lumotlar tasdiqlanmadi.
Ma’lumot uchun, Karles Peres 2012 yilda “Barselona” yoshlar jamoasiga qo‘shilgan. U Kataloniya klubida sakkiz yil to‘p surgan.
Keyinchalik futbolchi “Roma” jamoasiga o‘tgan. “Barselona”ning asosiy tarkibida Peres 13 o‘yin o‘tkazib, ikki marta gol urgan va uchta golli uzatmani amalga oshirgan.
