Inter Mayami futbol klubi o‘zining asosiy futbolchisi Lionel Messi bilan shartnomani uzaytirish ustida ish olib bormoqda. Bu haqida Euro-football.ru xabar berdi.
Mahalliy manbalarga ko‘ra, klub Messiga uch yilga yoki undan ham uzoq muddatga mo‘ljallangan yangi shartnoma taklif qilishni rejalashtirmoqda. Shu bilan birga, yangi shartnomada muhim bir band bo‘ladi: Messi istalgan vaqtda o‘z faoliyatini yakunlashga qaror qilsa, bu haqda klubga xabar berishi mumkin.
Ya’ni, Messi o‘zini charchagan yoki maydonda o‘ynash istagi qolmagan deb hisoblasa, futbolchilik faoliyatini to‘xtatish huquqiga ega bo‘ladi. Bundan tashqari, shartnomaga ko‘ra, Messi faoliyatini yakunlagach, klubda boshqa lavozimda ishlash imkoniyatiga ega bo‘ladi.
Qolaversa, Lionel Messi Inter Mayami klubining aksiyalariga ham egalik qiladi. Bu holat 2023 yil yozida tuzilgan dastlabki shartnomada ham belgilab qo‘yilgan edi.
Shunday qilib, Lionel Messining futbolchilik faoliyati qachon tugashini aniq aytish qiyin. Hozirda Messining yoshi 38 da.
Agar u yangi shartnomani imzolasa ham, 2028 yilgacha faol o‘ynashi aniq emas. Klub va futbolchi o‘rtasidagi hamkorlik shartlari ikki tomon manfaatlarini inobatga olgan holda tuzilmoqda.
