“Inter” Nkunku transferi bo‘yicha “Chelsi” bilan muzokara boshladi
Milanning “Inter” klubi yozgi transfer oynasi yopilguniga qadar hujum chizig‘ini kuchaytirishni rejalashtirmoqda. Bu haqida Euro-football.ru xabar berdi.
Klub asosiy maqsad sifatida uzoq vaqt davomida Ademola Lukmanni ko‘rib kelgan edi. Biroq, “Atalanta” ushbu futbolchini qo‘yib yuborishga rozi bo‘lmadi.
Sport jurnalisti Matteo Moretto ma’lumotiga ko‘ra, endilikda “neradzurrilar” “Chelsi” hujumchisi Kristofer Nkunkuni tarkibga qo‘shib olish ustida ish olib bormoqda. Italiya klubi vakillari fransiyalik futbolchining agenti bilan bog‘lanishgan.
London klubi esa Nkunku bilan xayrlashmoqchi. Futbolchining o‘zi ham asosiy tarkibda o‘ynay oladigan jamoaga o‘tishni istamoqda.
Transfermarkt bahosiga ko‘ra, 27 yoshli hujumchining transfer narxi 35 million yevroga teng. Mazkur transfer amalga oshsa, “Inter” hujum chizig‘ini kuchaytirish imkoniga ega bo‘ladi.
Klub rahbariyati hozirda muzokaralar olib bormoqda va qaror tez orada qabul qilinishi kutilmoqda.
