Moskvaning “Dinamo” futbol klubi Braziliya chempionatida to‘p surayotgan yosh hujumchiga qiziqish bildirmoqda. Bu haqida Euro-football.ru xabar berdi.
Gap “Gremio” jamoasida o‘ynaydigan 19 yoshli vinger Edvard Alisson haqida bormoqda. Ushbu ma’lumotni sport sharhlovchisi Ivan Karpov o‘zining ijtimoiy tarmoqlarida e’lon qilgan.
Manbaga ko‘ra, “Dinamo” rahbariyati braziliyalik futbolchining transferi borasida “Gremio” bilan muzokaralarni boshlab yuborgan. “Gremio” o‘z futbolchisi uchun kamida 15 million yevro so‘ramoqda, ammo bu narx “Dinamo” klubini cho‘chitmayapti.
Ma’lumotlarga ko‘ra, Edvard Alissonga boshqa yirik klublar ham qiziqmoqda. Xususan, Angliyaning “Liverpul” va “Sautgempton” klublari ham ushbu futbolchini o‘z safida ko‘rishni istamoqda.
Edvard Alisson “Gremio” futbol akademiyasi tarbiyalanuvchisi hisoblanadi. U asosiy jamoada o‘tgan yil yozidan buyon o‘ynab kelmoqda.
Joriy mavsumda Alisson Braziliya klubi safida 19 ta o‘yinda maydonga tushib, bitta golli uzatmaga mualliflik qilgan. Klub rahbariyati yosh futbolchining salohiyatini yuqori baholamoqda va uning kelajagidan katta umid qilmoqda.
