Luis Dias Bavariyadagi ilk o‘yinidan mamnunligini bildirdi
Bavariya jamoasining yangi futbolchisi Luis Dias ilk bor jamoa safida maydonga tushdi. Bu haqida Euro-football.ru xabar berdi.
Kolumbiyalik hujumchi shanba kuni o‘rtoqlik uchrashuvida Lion jamoasiga qarshi o‘yinda ikkinchi bo‘lim boshida zaxiradan maydonga chiqdi. Uchrashuv Myunxen jamoasining 2:1 hisobidagi g‘alabasi bilan yakunlandi.
Luis Dias klub telekanaliga bergan intervyusida quyidagilarni aytdi: "Bavariya safida birinchi o‘yinimni o‘tkazganimdan juda xursandman. O‘yin juda qiziqarli o‘tdi.
Jamoamiz vaziyatni to‘liq nazorat qildi. Men ham bir nechta imkoniyatlarga ega bo‘ldim, afsuski, ularni golga aylantira olmadim.
Keyingi safar albatta gol uraman degan umiddaman. O‘zimni yaxshi his qilyapman.
Vaqt o‘tishi bilan jamoadoshlarimni yaxshiroq tushunib olaman va jamoaga yanada ko‘proq foyda keltirishga harakat qilaman," – dedi futbolchi. Eslatib o‘tamiz, 28 yoshli futbolchi Luis Dias iyul oyining oxirida Bavariya tomonidan Liverpul klubidan 70 million yevro evaziga xarid qilingan edi.
