Rossiya futbol uyushmasi etika qo‘mitasining sobiq a’zosi Andrey Sozin Rossiya chempionatida o‘ynayotgan Jedson Fernandes va Jerson Santosning o‘yinini baholadi. Bu haqida Euro-football.ru xabar berdi.
Ma’lumotlarga ko‘ra, Jedson yaqinda “Spartak” jamoasi tarkibiga “Beshiktash” klubidan 20,8 million yevro evaziga qo‘shildi. Jerson esa “Zenit”ga “Flamengo”dan 25 million yevroga o‘tgan.
Sozin fikricha, Jedson Moskvaga kelganida uni katta kutib olishdi, biroq hozircha uning o‘yinida jiddiy natija ko‘rinmayapti. Shuningdek, Jerson ham “Zenit” safida kutilgan darajada o‘zini ko‘rsata olmadi.
Ekspertning ta’kidlashicha, “Zenit” va “Spartak” tomonidan amalga oshirilgan qimmat transferlar hozircha o‘zini oqlamagan. Sozinning aytishicha, hozircha faqat “Zenit” klubi futbolchisi Luis Enrike o‘z transfer qiymatini to‘liq oqlay olgan yagona qimmat futbolchi bo‘lib turibdi.
Bugun “Zenit” jamoasi CSKA klubiga qarshi o‘yinda g‘alaba qozona olmadi, “Spartak” esa “Akron” jamoasiga qarshi o‘yinda ochko yo‘qotdi. Ikkala uchrashuv ham 1:1 hisobida yakunlandi.
Shu bois, yangi futbolchilar hozircha o‘z muxlislarini to‘liq xursand qila olgani yo‘q.
