"Yuventus" jamoasining markaziy himoyachisi Gleyson Bremer yaqinda maydonga qaytdi. Bu haqida Euro-football.ru xabar berdi.
U ilgari olgan jiddiy tizzadan jarohati – xochsimon payning uzilishi tufayli uzoq vaqt safdan chiqqan edi. Braziliyalik futbolchi "Reggiana" jamoasiga qarshi o‘rtoqlik uchrashuvida ishtirok etdi.
Bu uning so‘nggi o‘n oy ichida ilk o‘yini bo‘ldi. 28 yoshli futbolchi o‘yin yakunida o‘z his-tuyg‘ulari bilan o‘rtoqlashdi.
U: "Yana maydonga tushganimdan juda xursandman. O‘zimni yaxshi his qilyapman, biroq hozircha jismoniy holatim eng yuqori darajada emas", – deya ta’kidladi.
Bremer reabilitatsiya jarayoni haqida ham gapirdi. "Eng qiyin davr boshida bo‘ldi.
Shifokorlar menga to‘liq sog‘ayish uchun to‘qqiz oy kerak bo‘lishini aytishdi. Buni qabul qilish oson bo‘lmadi, chunki odatda bunday jarohatlarda tiklanish olti yoki yetti oy davom etadi", – dedi markaziy himoyachi.
Eslatib o‘tamiz, Gleyson Bremer o‘tgan yilning oktabr oyida Chempionlar ligasi doirasidagi "RB Leyptsig" jamoasiga qarshi o‘yinda jarohat olgan edi. U uzoq muddat safdan chiqqaniga qaramay, hozirda asta-sekin formada qaytmoqda.
Shu tariqa, futbolchi yana asosiy tarkibga qo‘shilish uchun harakat qilmoqda.
